दुलीयाजान, २७ डिसेम्बर : अखिल असम गोर्खा छात्र संघ (आग्सु) ले सन् २०२६ लाई स्वर्ण जयन्ती वर्षका रूपमा मनाउने ऐतिहासिक निर्णयअनुसार आफ्नो पचास वर्षे गौरवपूर्ण यात्राको औपचारिक शुभारम्भ दुलीयाजानस्थित बिहु तलीमा अत्यन्तै भव्य, अनुशासित र भावनात्मक वातावरणबीच सम्पन्न गरेको छ। गोर्खा समाजको शैक्षिक, सामाजिक तथा सांस्कृतिक उत्थानका लागि पाँच दशकदेखि निरन्तर संघर्षरत आग्सुको योगदानलाई स्मरण, सम्मान र भावी पुस्तामा हस्तान्तरण गर्ने उद्देश्यले आयोजना गरिएको यो समारोह संगठनको इतिहासमै अविस्मरणीय र ऐतिहासिक अध्यायका रूपमा स्थापित भएको छ।
२६ डिसेम्बरको बिहान ठीक ८ बजे सम्पन्न झण्डोत्तोलन कार्यक्रममा संगठनप्रतिको गहिरो सम्मान, निष्ठा र समर्पण स्पष्ट देखिन्थ्यो। झण्डोत्तोलनको क्षणमा उपस्थित अग्रज नेतृत्व, वर्तमान केन्द्रीय नेतृत्व तथा हजारौँ कार्यकर्ताहरू भावुक बनेका थिए। आग्सुको झण्डा फहराइँदै गर्दा विगतका आन्दोलन, त्याग, जेल–यात्रा, संघर्ष र उपलब्धिहरू सबैको स्मृतिमा जीवन्त बनेर उभिएका थिए। यस ऐतिहासिक क्षणले संगठनप्रति गर्वको अनुभूति गराउँदै आगामी यात्राप्रति नयाँ ऊर्जा, आत्मविश्वास र संकल्प थपेको अनुभूति गरिएको थियो।
दिउँसो १२:१५ बजे आयोजना गरिएको ‘स्वर्ण मिलन: आग्सुका नयाँ–पुराना सहयोद्धा सम्मेलन’ कार्यक्रमले सम्पूर्ण समारोहलाई झनै भावनात्मक र प्रेरणादायी बनायो। यस अवसरमा संगठनका विभिन्न कार्यकालमा केन्द्रीय नेतृत्व सम्हाल्नुभएका अग्रज व्यक्तित्वहरू श्रीमान् डा. हरक बहादुर क्षेत्री, श्रीमान् बिनोद खनाल, श्रीमान् दिल्लीराम शर्मा, श्रीमान् पुष्पधर शर्मा, श्रीमान् दिवाकर शर्मा, श्रीमान् कृष्ण नेवार, श्रीमान् बद्री क्षेत्री, श्रीमान् कुसुम लामा, श्रीमान् राम बुराथोकी, श्रीमान् राजेन सुबेदी, श्रीमान् रोहित सापकोटा, श्रीमान् शिव प्रधान, श्रीमान् होम सुब्बा, श्रीमान् चन्द्र सिंह थापा, श्रीमान् दिल्लु शर्मा, श्रीमान् थर्का अधिकारी, श्रीमान् भक्त प्रधान, श्रीमान् प्रेम नेवार, श्रीमान् एम प्रसाद आचार्य, श्रीमान् लोहित उप्रेती, श्रीमान् नित्य क्षेत्री, श्रीमान् गोपाल आचार्य, श्रीमान् सञ्जिब क्षेत्री, श्रीमान् पद्मो प्रधान, श्रीमान् बल बहादुर ठाकुरी, श्रीमान् पुष्प पौडेल, श्रीमान् नवीन कुमार लिम्बु, श्रीमान् मोहन क्षेत्री, श्रीमान् गंगाराम ढकाल, श्रीमान् राजेश खपाङ्गी, श्रीमान् जगदीश खनाल, श्रीमान् दिल बहादुर लिम्बु, श्रीमान् भीम बहादुर राई, श्रीमान् शंकर लामा, श्रीमान् जुधवीर प्रधान, श्रीमान् अनिल दाहाल, श्रीमान् राजेन क्षेत्री, श्रीमान् जय दाहाल, श्रीमान् सुरज गिरी, श्रीमान् केशव शर्मा, श्रीमान् राम अधिकारी, श्रीमान् सञ्जिब क्षेत्री तथा श्रीमान् मोहन सिंह मगरलगायतको गरिमामय उपस्थिति रहेको थियो।
यस ऐतिहासिक कार्यक्रममा पूर्व केन्द्रीय नेतृत्वसँगै ५०० भन्दा बढी क्षेत्रीय, जिल्ला तथा आञ्चलिक तहका पूर्व नेतृत्वकर्ताहरूको सहभागिता रहेको थियो। साथै केन्द्रीय, जिल्ला र आञ्चलिक सबै तहका हजारौँ वर्तमान कार्यकर्ताहरूको उल्लेखनीय उपस्थितिले आग्सु आज पनि जनआधारित, जीवित र संघर्षशील संगठन भएको स्पष्ट सन्देश प्रवाह गरेको थियो। एउटै स्थलमा अग्रज, वर्तमान नेतृत्व र विशाल कार्यकर्ता पंक्तिको भावनात्मक एकताले सम्पूर्ण कार्यक्रमलाई ऐतिहासिक र स्मरणीय बनाएको थियो।
कार्यक्रमका क्रममा व्यक्त मन्तव्यहरूमा संगठन स्थापना कालका कठिन दिनहरू, सीमित साधनबीच गरिएको संघर्ष, गोर्खा समाजको पहिचान र अधिकारका लागि आग्सुले खेलेको ऐतिहासिक भूमिका तथा आगामी दिनमा अझ सुदृढ, संगठित र जिम्मेवार ढङ्गले अघि बढ्नुपर्ने आवश्यकता भावुक रूपमा प्रस्तुत गरिएको थियो।
समग्रमा, अखिल असम गोर्खा छात्र संघ (आग्सु) को स्वर्ण जयन्ती वर्ष शुभारम्भ समारोहको झण्डोत्तोलन तथा नयाँ–पुराना कार्यकर्ता सम्मेलन भव्यता, भावुकता, ऐक्यबद्धता र जनसहभागिताको अद्वितीय उदाहरणका रूपमा सफलतापूर्वक सम्पन्न भएको छ। यस ऐतिहासिक आयोजनाले संगठनको पचास वर्षे गौरवपूर्ण यात्रालाई सम्मान गर्दै आगामी दिनमा गोर्खा समाजको अधिकार, पहिचान र उज्ज्वल भविष्य निर्माणका लागि अझ मजबुत आधार तयार गरेको छ