पश्चिम कार्बि आङलङ, ११ जानुवारी: आम्रेङ–कपिलि अञ्चलिक समितिको आयोजनामा शैक्षणिक सत्र २०२५–२६ का HSLC परीक्षार्थीहरूलाई लक्षित गरी सञ्चालन गरिएको पूर्व–अन्तिम परीक्षा सफलतापूर्वक सम्पन्न भएको छ। कक्षा १० मा अध्ययनरत विद्यार्थीहरूलाई SEBA बोर्ड परीक्षाको प्रभावकारी तयारीमा सहयोग पुर्याउने, उनीहरूको शैक्षिक स्तरको वास्तविक मूल्याङ्कन गर्ने तथा प्रतिस्पर्धात्मक वातावरणमा आत्मविश्वास विकास गराउने मुख्य उद्देश्यसहित उक्त परीक्षा आयोजना गरिएको थियो।
समितिले जारी गरेको आधिकारिक सूचनाअनुसार, यो पूर्व–अन्तिम परीक्षा २०२६ जनवरी ११ तारिख (आइतबार) का दिन सम्पन्न भएको हो। आम्रेङ–कपिलि अञ्चलिक कार्यक्षेत्रभित्र रहेका विभिन्न विद्यालयहरूबाट जम्मा ३५० जना HSLC परीक्षार्थीहरूको उल्लेखनीय सहभागिता रहेको यस परीक्षाका लागि कुल पाँचवटा परीक्षा केन्द्र तोकिएका थिए। ती परीक्षा केन्द्रहरूमा Mailoo Assamese High School, Hawaipur Higher Secondary School, Dayangmukh (PVN) High School, Jirikinding Vivekananda Vidyalaya तथा Jengkha Prabananda Vidya Mandir रहेका थिए।
परीक्षा SEBA बोर्डको निर्धारित पाठ्यक्रमअनुसार सञ्चालन गरिएको थियो, जसमा सामान्य विज्ञान र सामान्य गणित गरी दुई विषय समावेश थिए। दुवै विषयका प्रश्नपत्रहरू ५०–५० अंकका बहुवैकल्पिक प्रश्न (MCQ) आधारित तयार गरिएको थियो, जसले विद्यार्थीहरूको अवधारणागत स्पष्टता, विश्लेषणात्मक क्षमता र समय व्यवस्थापन सीपको परीक्षण गरेको आयोजक समितिले जनाएको छ। परीक्षार्थीहरूलाई सहजता प्रदान गर्न प्रश्नपत्रहरू अंग्रेजी तथा असमिया दुवै भाषामा उपलब्ध गराइएको थियो।
परीक्षा सञ्चालनका क्रममा बोर्डद्वारा तोकिएका सबै आवश्यक मापदण्ड, नियम तथा अनुशासन कडाइका साथ पालना गरिएको थियो। केन्द्र अधीक्षक, निरीक्षक, आग्सुका पदाधिकारी तथा स्वयंसेवकहरूको सक्रिय समन्वय र जिम्मेवार भूमिकाका कारण परीक्षा सम्पूर्ण रूपमा शान्तिपूर्ण, व्यवस्थित र पारदर्शी ढङ्गले सम्पन्न भएको छ। परीक्षा अवधिभर कुनै पनि अवाञ्छित घटना नघट्नुले आयोजनाको सफल व्यवस्थापनलाई झल्काएको छ।
आग्सु, आम्रेङ–कपिलि अञ्चलिक समितिले यस परीक्षामा प्रत्यक्ष तथा अप्रत्यक्ष रूपमा सहयोग पुर्याउने सबै विद्यालय प्रशासन, शिक्षकवर्ग, अभिभावक, स्वयंसेवक तथा सहभागी विद्यार्थीहरूप्रति आभार व्यक्त गरेको छ। समितिको धारणा अनुसार, यस किसिमका शैक्षिक पहलहरूले ग्रामीण तथा अर्धग्रामीण क्षेत्रका विद्यार्थीहरूलाई मुख्य बोर्ड परीक्षाप्रति मानसिक रूपमा तयार गराउनुका साथै उनीहरूको कमजोरी पहिचान गरी सुधार गर्ने अवसर प्रदान गर्छ।
AAGSU (AKRC) द्वारा गरिएको यो प्रयासले यस क्षेत्रका विद्यार्थीहरूको शैक्षिक विकास, आत्मविश्वास अभिवृद्धि तथा उज्ज्वल भविष्य निर्माणप्रति सङ्घको निरन्तर प्रतिबद्धता स्पष्ट रूपमा झल्काएको छ। आगामी दिनहरूमा पनि आग्सु आम्रेङ–कपिलि अञ्चलिक समितिले यस्ता शैक्षिक, सामाजिक र मार्गदर्शनमूलक कार्यक्रमहरूलाई निरन्तरता दिने प्रतिबद्धता व्यक्त गरेको छ।
प्रतिवेदन: रोशन शर्मा (सूबेदी)-सभापति, आम्रेङ–कपिलि अञ्चलिक समिति( आग्सु)।
