टिङराइ,१० फेब्रुवारी: अखिल असम गोर्खा छात्र संघ (आग्सु) टिङराइ अञ्चलिक समितिको तर्फबाट यस वर्ष हाइस्कुल शिक्षान्त परीक्षा दिने विद्यार्थीहरूलाई लक्षित गर्दै घरदैलो शुभेच्छा कार्यक्रम सम्पन्न गरिएको छ। परीक्षाको पूर्वसन्ध्यामा आयोजना गरिएको उक्त कार्यक्रमअन्तर्गत आग्सुका कार्यकर्ताहरूले विद्यार्थीहरूको घरघरमै पुगेर आत्मबल बढाउने सन्देशसहित सफलताको कामना व्यक्त गरेका थिए।
कार्यक्रमको मुख्य उद्देश्य परीक्षार्थीहरूमा आत्मविश्वास अभिवृद्धि गर्नु, अध्ययनप्रतिको सकारात्मक सोच सुदृढ बनाउनु तथा समाज र संगठन सदैव उनीहरूको साथमा रहेको अनुभूति दिलाउनु रहेको थियो। घरदैलो अभियानका क्रममा आग्सु टिङराइ अञ्चलिक समितिका कार्यकर्ताहरूले परीक्षार्थी तथा अभिभावकसँग संक्षिप्त संवाद गर्दै नियमित अध्ययन, समय व्यवस्थापन र मानसिक सन्तुलन कायम राख्न प्रेरणादायी सुझावहरू दिएका थिए। परीक्षालाई केवल अंकको प्रतिस्पर्धा नभई जीवनको एक महत्वपूर्ण चरणका रूपमा लिन आग्रह गर्दै धैर्य, अनुशासन र आत्मविश्वासका साथ परीक्षा दिन प्रोत्साहित गरिएको थियो।

उक्त कार्यक्रममा तिनसुकिया जिल्ला समितिका सचिव मिलन शर्मा विशेष रूपमा उपस्थित रहेका थिए। सचिव मिलन शर्माले परीक्षार्थीहरूसँग प्रत्यक्ष संवाद गर्दै कडा परिश्रम, सकारात्मक सोच र लक्ष्यप्रति दृढताले सफलता सुनिश्चित गर्ने बताए। उनले विद्यार्थीहरूलाई परीक्षा अवधिमा तनावबाट टाढा रहन, आफ्नो क्षमतामा विश्वास गर्न र परिणाम जेसुकै आए पनि निरन्तर संघर्ष र अध्ययनलाई जीवनको आधार बनाइराख्न सुझाव दिए। साथै, उनले अभिभावकहरूलाई पनि आफ्ना सन्तानलाई दबाब भन्दा बढी माया, साथ र प्रेरणा दिन आग्रह गरे।
घरदैलो अभियानका क्रममा स्थानीय अभिभावकहरूले आग्सुको यस पहलको खुलेर प्रशंसा गरेका थिए। संगठनले विद्यार्थीहरूको शैक्षिक यात्रामा चासो देखाउँदै प्रत्यक्ष रूपमा घरमै पुगेर शुभेच्छा व्यक्त गर्नुले समाज र संगठनबीचको सम्बन्ध अझ मजबुत बनेको अभिभावकहरूको भनाइ थियो। धेरै परीक्षार्थीहरूले पनि आग्सुका कार्यकर्ताहरूको उपस्थितिले आफूहरूमा नयाँ ऊर्जा र आत्मविश्वास थपिएको प्रतिक्रिया दिएका थिए।
आग्सु टिङराइ अञ्चलिक समितिले शिक्षा क्षेत्रलाई आफ्नो प्राथमिक एजेन्डामध्ये एकका रूपमा लिँदै यस प्रकारका रचनात्मक कार्यक्रमहरू आगामी दिनहरूमा पनि निरन्तर सञ्चालन गरिने जनाएको छ। संगठनले हाइस्कुल शिक्षान्त परीक्षा दिने सम्पूर्ण विद्यार्थीहरूको उज्ज्वल भविष्यको कामना गर्दै इमानदार मेहनत र अनुशासन नै सफलताको मूल मन्त्र भएको सन्देश दिएको छ।

प्रतिवेदक: मिलन शर्मा-सचिव,तिनसुकिया जिला समिति।