तेजपुर, ९ फेब्रुअरी: असमको शोणितपुर जिल्ला अन्तर्गत तेजपुर चान्दमारी क्षेत्रमा अखिल असम गोर्खा छात्र संघ (आग्सु) ले आफ्नो स्वर्ण जयंती वर्षलाई ऐतिहासिक मोड दिँदै “स्वर्ण जयंती भवन” निर्माण कार्यको औपचारिक शुभारम्भ गरेको छ। गोर्खा समुदायको शैक्षिक, सामाजिक तथा संगठनात्मक गतिविधिलाई दीर्घकालीन रूपमा सुदृढ बनाउने उद्देश्यले निर्माण गर्न लागिएको उक्त भवनलाई समुदायको साझा सपना र गौरवको परियोजनाका रूपमा हेरिएको छ।
निर्माण कार्यको शुभारम्भ आग्सुका सभापति श्रीमान सुनिल छेत्री ज्यूको गरिमामय उपस्थितिमा परम्परागत विधि अनुसार भूमिपूजन तथा शिलान्यास कार्यक्रम सम्पन्न गरी गरिएको हो। कार्यक्रममा धार्मिक मन्त्रोच्चारणसँगै विधिवत् पूजा सम्पन्न गरिएको थियो। समारोहमा उपस्थित विभिन्न तहका प्रतिनिधि तथा समुदायका अगुवाहरूले यो क्षणलाई गोर्खा छात्र आन्दोलनको इतिहासमा स्मरणीय अध्यायका रूपमा व्याख्या गरेका थिए।
कार्यक्रमस्थलमा दिनभरि उत्साह र उमङ्गको वातावरण देखिएको थियो। स्थानीय बासिन्दा, समाजसेवी, बुद्धिजीवी तथा विद्यार्थीहरूको उल्लेखनीय उपस्थितिले निर्माण कार्यप्रति समुदायको गहिरो चासो र समर्थन झल्काएको थियो। आग्सु शोणितपुर जिल्ला सभापति दीपक सुब्बा ज्यूले आफ्नो मन्तव्य राख्दै स्वर्ण जयंती वर्षमा सुरु गरिएको यो भवन निर्माण अभियानले संगठनलाई भौतिक रूपमा मात्र नभई वैचारिक र संरचनात्मक रूपमा समेत मजबुत बनाउने विश्वास व्यक्त गर्नुभयो। उहाँले समुदायको एकता र सहयोगबिना यस्ता दीर्घकालीन परियोजना सम्भव नहुने उल्लेख गर्दै सबैलाई निरन्तर साथ दिन आग्रह गर्नुभयो।
आगामी दिनमा निर्माण सम्पन्न भएपछि “स्वर्ण जयंती भवन” मा आग्सुको केन्द्र, जिल्ला तथा स्थानीय आञ्चलिक समितिहरूका लागि अस्थायी कार्यालय सञ्चालन गरिने जानकारी दिइएको छ। यसका साथै, बाहिरबाट आउने अतिथिहरूका लागि सुविधासम्पन्न अतिथिशालाको व्यवस्था गरिनेछ भने विद्यार्थी तथा पाठकहरूका लागि पुस्तकालय पनि स्थापना गरिने योजना रहेको बताइएको छ। पुस्तकालयमा शैक्षिक सामग्री, प्रतिस्पर्धात्मक परीक्षासम्बन्धी पुस्तक तथा अनुसन्धानका स्रोतहरू उपलब्ध गराउने लक्ष्य राखिएको छ, जसबाट विशेषगरी विद्यार्थी वर्ग लाभान्वित हुने अपेक्षा गरिएको छ।
वक्ताहरूले यस्तो भवनले गोर्खा समुदायबीच आपसी समन्वय र एकतालाई थप सुदृढ बनाउँदै नयाँ पुस्तालाई संगठित रूपमा अघि बढ्न प्रेरणा दिने धारणा व्यक्त गरेका थिए। उनीहरूले स्वर्ण जयंती वर्षलाई केवल उत्सवमा सीमित नराखी स्थायी उपलब्धिमा रूपान्तरण गर्नु नै साँचो सम्मान हुने बताएका थिए। समुदायको पहिचान, अधिकार र प्रगतिका सवालमा आग्सुले खेलेको भूमिकालाई स्मरण गर्दै अबको चरणमा संस्थागत संरचना बलियो बनाउनु आवश्यक रहेको उनीहरूको भनाइ थियो।
स्वर्ण जयंती वर्षको अवसरमा सुरु गरिएको “स्वर्ण जयंती भवन” निर्माण कार्यलाई गोर्खा समुदायको पहिचान, एकता र समग्र प्रगतिका प्रतीकका रूपमा हेरिएको छ। शिक्षा, सामाजिक सेवा, नेतृत्व विकास तथा विभिन्न रचनात्मक कार्यक्रमहरू यही भवनबाट सञ्चालन हुने विश्वास गरिएको छ। समग्रमा, तेजपुर चान्दमारीमा सुरु भएको यो पहलले शोणितपुर मात्र होइन, सम्पूर्ण असमका गोर्खा समुदायलाई जोड्ने साझा थलोका रूपमा भविष्यमा महत्वपूर्ण भूमिका निर्वाह गर्ने अपेक्षा गरिएको छ।
प्रतिवेदक: चन्द्र गौतम- कार्यकारिणी सदस्य, शोणितपुर जिला समिति।
