गुवाहाटी,८ मार्च — अन्तर्राष्ट्रिय महिला दिवसको पावन अवसरमा अखिल असम गोर्खा छात्र संघ (आग्सु) ले समाज, परिवार तथा राष्ट्र निर्माणमा अतुलनीय योगदान पुर्याउँदै आएका सम्पूर्ण गोर्खा दिदीबहिनीहरूलाई हार्दिक सम्मान तथा शुभकामना व्यक्त गरेको छ।
आज विश्वभर मनाइने अन्तर्राष्ट्रिय महिला दिवसको सन्दर्भमा आग्सुले जारी गरेको शुभकामना सन्देशमार्फत नारीहरूको साहस, समर्पण, संघर्ष तथा प्रेरणादायी भूमिकाप्रति उच्च सम्मान व्यक्त गरिएको छ। संघले गोर्खा समाजमा दिदीबहिनीहरूले पुर्याइरहेका महत्वपूर्ण योगदानलाई स्मरण गर्दै उनीहरूको सक्रिय सहभागिता र नेतृत्वले समाजलाई निरन्तर प्रगतिपथमा अघि बढाइरहेको उल्लेख गरेको छ।
सन्देशमा भनिएको छ कि नारी शक्ति केवल परिवारको आधार मात्र नभई समाज र राष्ट्रको मार्गदर्शक शक्ति पनि हो। शिक्षा, सामाजिक सेवा, संस्कार–संस्कृति संरक्षण तथा विभिन्न क्षेत्रमा नारीहरूको सक्रिय उपस्थितिले समाजलाई सुदृढ र समृद्ध बनाउँदै लगेको संघले उल्लेख गरेको छ।
आग्सुले गोर्खा समाजका दिदीबहिनीहरूको त्याग, परिश्रम र समर्पणका कारण नै सामाजिक चेतना, समानता र विकासका मूल्यहरू अझ सुदृढ हुँदै गएको विश्वास व्यक्त गरेको छ। आजको दिनले नारी अधिकार, सम्मान र समान अवसरको पक्षमा थप चेतना जगाउने तथा समाजमा सकारात्मक परिवर्तन ल्याउने अवसर प्रदान गर्ने संघको धारणा रहेको छ।
संघले आफ्नो सन्देशमार्फत सम्पूर्ण गोर्खा दिदीबहिनीहरू सधैं आत्मविश्वासी, सशक्त तथा सफल रहून् भन्ने कामना गर्दै उनीहरूको उज्ज्वल भविष्यको लागि हार्दिक शुभेच्छा व्यक्त गरेको छ। साथै समाज निर्माणमा नारीहरूको महत्वपूर्ण भूमिकालाई सधैं सम्मान गर्न र उनीहरूको अधिकार तथा गरिमाको संरक्षणका लागि सबैले सामूहिक रूपमा अघि बढ्नुपर्ने आवश्यकता पनि औंल्याइएको छ।
अन्त्यमा आग्सुले अन्तर्राष्ट्रिय महिला दिवसको अवसरमा सम्पूर्ण गोर्खा दिदीबहिनीहरूलाई पुनः हार्दिक शुभकामना व्यक्त गर्दै उनीहरूको साहस, संघर्ष र प्रेरणाले समाजलाई अझ उज्यालो भविष्यतर्फ डोर्याइरहने विश्वास व्यक्त गरेको छ।
