डिगबोई, ३० डिसेम्बर: पश्चिम बंगालको अलीपुरद्वारमा २६ डिसेम्बर २०२५ तारिखका दिन सम्पन्न राष्ट्रियस्तरको National Karate Competition मा असमको डिगबोई क्षेत्रका दुई गोर्खा चेलीहरूले उल्लेखनीय सफलता हासिल गर्दै सम्पूर्ण गोर्खा समुदायलाई गौरवान्वित बनाएका छन्। देशका विभिन्न राज्यबाट सहभागी सयौँ खेलाडीबीच भएको कडा प्रतिस्पर्धामा डिगबोईकी खुसबु छेत्री र आरोही नेवारले आफ्नो अद्भुत क्षमता, अनुशासन र आत्मविश्वासको परिचय दिँदै पदक जित्न सफल भएका हुन्।
राजु छेत्री र लक्ष्मी छेत्रीकी छोरी खुसबु छेत्रीले Under-17 वर्गमा प्रतिस्पर्धा गर्दै उत्कृष्ट खेल प्रदर्शनका साथ पहिलो स्थान हासिल गरिन्। प्रतियोगिताको सुरुदेखि अन्तिम चरणसम्म उनले देखाएको आक्रामक खेलशैली, रणनीतिक चाल र मानसिक दृढताले निर्णायक तथा दर्शक दुवैलाई प्रभावित बनाएको थियो। प्रत्येक राउन्डमा आत्मविश्वासका साथ प्रतिद्वन्द्वीलाई पराजित गर्दै उनले स्वर्ण पदक आफ्नो नाममा सुरक्षित गरिन्। राष्ट्रिय मञ्चमा पहिलो स्थान हासिल गर्नु खुसबुका लागि मात्र नभई डिगबोई क्षेत्र र समग्र असमेली गोर्खा समाजका लागि गर्वको विषय बनेको छ।
त्यसैगरी रोशन कुमार नेवार र राधिका नेवारकी छोरी आरोही नेवारले Under-13 वर्गमा प्रतिस्पर्धा गर्दै प्रशंसनीय प्रदर्शनका साथ दोस्रो स्थान हासिल गर्न सफल भइन्। कम उमेरमै राष्ट्रिय प्रतियोगितामा सहभागी भई रजत पदक जित्नु उनको प्रतिभा, कडा अभ्यास र उज्ज्वल भविष्यको स्पष्ट संकेत हो। कठिन प्रतिस्पर्धाबीच पनि आरोहीले देखाएको धैर्यता, अनुशासन र खेल भावना सबैका लागि प्रेरणादायी बनेको छ।
यी दुवै खेलाडीको सफलताले गोर्खा समुदायका बालबालिका तथा युवाहरूलाई खेलकुदतर्फ आकर्षित गर्न थप हौसला प्रदान गरेको छ। कराते जस्तो अनुशासन, साहस र आत्मनियन्त्रण सिकाउने खेलमा डिगबोईका चेलीहरूले राष्ट्रिय स्तरमा आफ्नो पहिचान बनाउनु अत्यन्तै महत्वपूर्ण उपलब्धि मानिएको छ। सीमित अभ्यास सुविधा र चुनौतीपूर्ण परिस्थितिका बाबजुद पनि निरन्तर मेहनत, प्रशिक्षकहरूको मार्गदर्शन तथा अभिभावकहरूको सहयोगले यस्तो सफलता सम्भव भएको बताइएको छ।
प्रतियोगिता सम्पन्न भई आज दुवै चेलीहरू घर फर्किएपछि डिगबोई क्षेत्रमा खुसीको माहोल सिर्जना भएको थियो। यस अवसरमा रामु नेवार सभापति डिगबोई आञ्चलिक समिति, वासु जैसी उपसभापति डिगबोई आञ्चलिक समिति, राम ठकुरी सह-सम्पादक डिगबोई आञ्चलिक समिति तथा सन्जु छेत्री सभापति बा:मु: शाखा समितिको नेतृत्वमा एक टोलीले खेलाडीहरूको निवासमा पुगेर शुभकामना तथा सम्मान प्रदान गरेको थियो। टोलीले खुसबु छेत्री र आरोही नेवारको सफलतालाई डिगबोई क्षेत्रका लागि ऐतिहासिक उपलब्धि भन्दै उज्ज्वल भविष्यको कामना व्यक्त गरेको थियो।
स्थानीय बौद्धिक वर्ग, खेलप्रेमी तथा सामाजिक व्यक्तित्वहरूले पनि दुवै खेलाडीलाई हार्दिक बधाई दिँदै भविष्यमा राष्ट्रिय मात्र होइन अन्तर्राष्ट्रिय स्तरमा समेत देश र समुदायको नाम उज्यालो पार्ने विश्वास व्यक्त गरेका छन्। डिगबोईका यी दुई गोर्खा चेलीहरूको सफलता केवल दुई पदकमा सीमित नभई गोर्खा समुदायको क्षमता, साहस र सम्भावनाको सशक्त प्रमाणका रूपमा स्थापित भएको छ।

प्रतिवेदन: रामु नेवार- सभापति, डिगबै आञ्चलिक समिति (आग्सु)।