अखिल असम गोर्खा छात्र संघ (आग्सु) बान्दरगुरी आञ्चलिक समितिले आउँदै गरेको HSLC परीक्षालाई ध्यानमा राख्दै विद्यार्थीहरूको शैक्षिक अवस्थाबारे प्रत्यक्ष बुझ्ने तथा उनीहरूलाई आवश्यक मार्गदर्शन प्रदान गर्ने उद्देश्यले विशेष पहल अघि बढाएको छ। आञ्चलिक समितिका सभापति श्री किरण अधिकारी ज्यूको निर्देशन तथा आञ्चलिक समितिका शिक्षा सचिव श्री कालिदास छेत्रीको सक्रिय अगुवाइमा सुरु गरिएको यस अभियान अन्तर्गत HSLC परीक्षामा सहभागी हुन गइरहेका छात्र–छात्राहरूको तयारी, पढाइको अवस्था र उनीहरूका आवश्यकता नजिकबाट अवलोकन गरिँदैछ।
यस अभियानलाई थप सशक्त र प्रभावकारी बनाउन आञ्चलिक समितिका सम्माननीय मूल–सचिव श्री सागर छेत्री ज्यू तथा पूर्व सह–सचिव श्री दीपक छेत्री ज्यूको महत्वपूर्ण सहयोग रहेको छ। समितिका पदाधिकारी तथा सदस्यहरू विद्यार्थीहरूको घर–घरमा पुगेर उनीहरूलाई प्रत्यक्ष भेटघाट गर्दै परीक्षा तयारीसम्बन्धी परामर्श, अध्ययनका उपयोगी सुझाव, मानसिक तयारीका उपाय तथा प्रेरणामूलक सन्देश प्रदान गरिरहेका छन्। यस क्रममा विद्यार्थीहरूका समस्या, जिज्ञासा र चुनौतीहरू सुनेर तिनको समाधानका लागि आवश्यक सल्लाह पनि दिइँदैछ।
घरदैलो अभियानका क्रममा अभिभावकहरूसँग समेत छलफल गर्दै HSLC परीक्षाको महत्व, नियमित अध्ययनको आवश्यकता, समय व्यवस्थापन तथा सकारात्मक वातावरण सिर्जना गर्नुपर्ने विषयमा सचेतना गराइएको छ। यसले विद्यार्थी र अभिभावकबीच सहकार्य र समझदारी बढाउन मद्दत पुर्याउने विश्वास लिइएको छ।
यसै सन्दर्भमा, बी.टी.सी. क्षेत्रीय समितिद्वारा यही ११ तारिखका दिन आयोजना हुन गइरहेको Mock Test सम्बन्धी सम्पूर्ण जानकारी पनि विद्यार्थी तथा अभिभावकहरूलाई अवगत गराइएको छ। उक्त Mock Test ले विद्यार्थीहरूलाई वास्तविक HSLC परीक्षा अघि आफ्नो तयारीको स्तर मूल्याङ्कन गर्ने, परीक्षा ढाँचासँग परिचित हुने तथा आत्मविश्वास बढाउने महत्वपूर्ण अवसर प्रदान गर्ने अपेक्षा गरिएको छ। आञ्चलिक समितिले Mock Test मा अधिकतम विद्यार्थीहरूको सहभागिता सुनिश्चित गर्न विशेष आग्रहसमेत गरेको छ।
आग्सु बान्दरगुरी आञ्चलिक समिति विद्यार्थीहरूको शैक्षिक उन्नति, उज्ज्वल भविष्य र समग्र विकासलाई केन्द्रमा राख्दै यस्ता सकारात्मक तथा व्यावहारिक कार्यक्रमहरू निरन्तर सञ्चालन गर्दै आएको छ। भविष्यमा पनि विद्यार्थी हितका लागि शैक्षिक जागरूकता, मार्गदर्शन तथा सहयोगात्मक कार्यक्रमहरूलाई अझ प्रभावकारी रूपमा अघि बढाइने प्रतिबद्धता यस अवसरमा पुनः व्यक्त गरिएको छ।
प्रतिवेदन: कालिदास छेत्री- शिक्षा सचिव, बान्दरगुरी आञ्चलिक समिति ( आग्सु)।
