तामुलपुर, ६ मे २०२६: अखिल असम गोर्खा छात्र संघ, तामुलपुर आञ्चलिक समितिले यस वर्षको हाई स्कूल शिक्षान्त परीक्षा (HSLC) तथा ह उच्च माध्यमिक (HS) परीक्षामा प्रथम श्रेणीमा उत्कृष्ट सफलता हासिल गर्ने विद्यार्थीहरूलाई विशेष कार्यक्रममार्फत सम्मान तथा अभिनन्दन गरेको छ। समितिले औपचारिक कार्यक्रम स्थलको सट्टा विद्यार्थीहरूको घरमै पुगेर सम्मान गर्ने नयाँ र प्रेरणादायी अभ्यास प्रस्तुत गरेको छ, जसले स्थानीय समुदायमा सकारात्मक सन्देश प्रवाह गरेको छ।

तामुलपुर आञ्चलिक क्षेत्रका विभिन्न स्थानहरूबाट उत्कृष्ट नतिजा हासिल गर्न सफल विद्यार्थीहरू प्रितम उपाध्याय, प्रीति गुरुङ, कञ्चन प्रधान, रिस्ता उपाध्याय तथा निकिता छेत्रीलाई समितिका पदाधिकारीहरूले उहाँहरूको निवासमै पुगेर सम्मान गरेका थिए। प्रत्येक विद्यार्थीलाई खादा, प्रशंसापत्र तथा शुभकामना सन्देश प्रदान गर्दै उनीहरूको मेहनत र उपलब्धिको कदर गरिएको थियो। यस प्रकारको पहलले विद्यार्थीहरूलाई थप हौसला प्रदान गर्नुका साथै अभिभावकहरूमा समेत गर्वको अनुभूति गराएको स्थानीयहरूले बताएका छन्।

सम्मान कार्यक्रममा तामुलपुर आञ्चलिक समितिका सभापति नारायण गौतम, उपसभापति जमुना छेत्री तथा कार्यकारिणी सदस्यहरू अटल कार्की र विवेक उपाध्यायको सक्रिय सहभागिता रहेको थियो। टोलीले प्रत्येक विद्यार्थीको घरमा पुगेर व्यक्तिगत रूपमा बधाई ज्ञापन गर्दै उनीहरूको शैक्षिक यात्रामा निरन्तर प्रगति होस् भन्ने कामना व्यक्त गरेका थिए। कार्यक्रममा सहभागी पदाधिकारीहरूले विद्यार्थीहरूको सफलता केवल व्यक्तिगत उपलब्धि मात्र नभई सम्पूर्ण समाजको गौरव भएको धारणा राखेका थिए।

सभापति नारायण गौतमले विद्यार्थीहरूलाई सम्बोधन गर्दै निरन्तर मेहनत, अनुशासन र लगनशीलता नै सफलता प्राप्त गर्ने मुख्य आधार भएको उल्लेख गरे। उनले वर्तमान उपलब्धिलाई भविष्यको ठूलो लक्ष्यतर्फको पहिलो पाइला भन्दै आगामी दिनहरूमा अझ उत्कृष्ट प्रदर्शन गर्न आग्रह गरे। उपसभापति जमुना छेत्रीले पनि विद्यार्थीहरूलाई उच्च शिक्षा हासिल गर्दै समाजप्रति उत्तरदायी नागरिक बन्न प्रेरित गरिन्। उनले शिक्षा नै सशक्त समाज निर्माणको प्रमुख आधार भएकाले यसलाई निरन्तरता दिनुपर्नेमा जोड दिइन्।

कार्यक्रमका क्रममा कार्यकारिणी सदस्यहरू अटल कार्की र विवेक उपाध्यायले पनि विद्यार्थीहरूको सफलताले अन्य युवाहरूलाई प्रेरणा दिने विश्वास व्यक्त गरे। उनीहरूले आगामी दिनहरूमा पनि यस्ता सम्मान कार्यक्रमलाई निरन्तरता दिने योजना रहेको जानकारी गराउँदै शैक्षिक क्षेत्रलाई प्राथमिकतामा राखेर काम गरिने बताए।

यस पहलले तामुलपुर क्षेत्रमा शैक्षिक वातावरणलाई थप उत्साहित बनाएको छ। विद्यार्थीहरूको घरमै पुगेर गरिएको सम्मान कार्यक्रमले समाज र संगठनबीचको सम्बन्धलाई अझ मजबुत बनाएको स्थानीय बुद्धिजीवीहरूले प्रतिक्रिया दिएका छन्। आग्सु तामुलपुर आञ्चलिक समितिको यस कदमलाई शिक्षा प्रवर्द्धनतर्फको सकारात्मक उदाहरणको रूपमा लिइएको छ।

प्रतिवेदक: नारायण गौतम- सभापति, तामुलपुर आञ्चलिक समिति।