कोमोलिया, ६ सेप्टेम्बर २०२६: कोमोलिया आञ्चलिक अखिल असम गोर्खा छात्र संघ (आग्सु) को आयोजनामा तथा कोमोलिया महिला कीर्तन संघको सहकार्यमा भव्य तीज मिलन समारोह सम्पन्न भएको छ। स्थानीय महिला, युवा, अभिभावक, सामाजिक कार्यकर्ता तथा शुभेच्छुकहरूको उत्साहजनक सहभागिताका बीच सम्पन्न कार्यक्रममा ३०० भन्दा बढी स्थानीय जनसमुदायको उपस्थिति रहेको थियो।
गोर्खाली समुदायको महत्वपूर्ण सांस्कृतिक पर्वका रूपमा मनाइने तीजको अवसरमा आयोजित उक्त कार्यक्रममा मौलिक संस्कृति, परम्परा र सामाजिक एकतालाई विशेष प्राथमिकता दिइएको थियो। कार्यक्रममा स्थानीय महिलाहरूले गोर्खाली समुदायको मौलिक सांस्कृतिक पहिचान झल्काउने संगिनी, मारुनीलगायत विभिन्न परम्परागत नृत्य तथा गीत प्रस्तुत गरेका थिए। सांस्कृतिक प्रस्तुतिले उपस्थित दर्शकलाई मनोरञ्जन प्रदान गर्नुका साथै नयाँ पुस्तालाई आफ्नो भाषा, संस्कृति, परम्परा तथा मौलिक पहिचानप्रति जोडिन प्रेरित गरेको थियो।
समारोहमा अखिल असम गोर्खा छात्र संघ (आग्सु) विश्वनाथ जिल्ला समितिका मूल–सचिव नबदीप छेत्री, शिक्षा सचिव नोमल उपाध्याय, जिल्ला परिषद् सदस्य दिपाली देवी, स्थानीय शिक्षक तथा सामाजिक कार्यकर्ता कृष्ण नील कार्की, ह्याप्पी चाइल्ड इङ्लिस स्कुलका निर्देशक जीवन शर्मा लगायत विभिन्न क्षेत्रका विशिष्ट व्यक्तित्वहरूको उपस्थिति रहेको थियो। अतिथिहरूले तीज पर्वको सामाजिक तथा सांस्कृतिक महत्वमाथि प्रकाश पार्दै नेपाली/गोर्खाली समाजमा आपसी एकता, सद्भाव र भाइचारालाई अझ मजबुत बनाउन यस्ता सांस्कृतिक कार्यक्रमहरूको महत्वपूर्ण भूमिका रहने धारणा व्यक्त गरेका थिए।
वक्ताहरूले बदलिँदो सामाजिक परिवेशमा नयाँ पुस्तामाझ मौलिक भाषा, संस्कृति, कला तथा परम्पराको संरक्षण र प्रवर्द्धन गर्न सामूहिक पहल आवश्यक रहेको उल्लेख गरे। विशेषगरी युवा पुस्तालाई आफ्नो सांस्कृतिक जरा र पहिचानसँग जोड्दै परम्परागत संस्कृतिलाई पुस्तान्तरण गर्न यस्ता कार्यक्रम प्रभावकारी माध्यम बन्न सक्नेमा जोड दिइएको थियो।
कार्यक्रमलाई सफल बनाउन कोमोलिया आञ्चलिक आग्सुका सभापति अनुज शर्मा, मूल–सचिव शिव छेत्री लगायत सम्पूर्ण कार्यसमितिले सक्रिय भूमिका निर्वाह गरेका थिए। आयोजक तथा सहयोगी संस्थाका पदाधिकारीहरूको समन्वय, स्थानीय महिला तथा जनसमुदायको उल्लेखनीय सहभागिता र सांस्कृतिक प्रस्तुतिले समारोहलाई थप भव्य र व्यवस्थित बनाएको थियो।
समारोहले तीज पर्वको सांस्कृतिक महत्वलाई उजागर गर्नुका साथै स्थानीय गोर्खाली समुदायबीच आपसी सद्भाव, एकता र सामाजिक सम्बन्धलाई थप मजबुत बनाउने सकारात्मक सन्देश दिएको छ। साथै, आफ्ना मौलिक संस्कृति र परम्पराको संरक्षण गर्दै भावी पुस्तामा त्यसको हस्तान्तरण गर्न सामूहिक रूपमा अघि बढ्नुपर्ने आवश्यकता पनि कार्यक्रमले औँल्याएको छ।
प्रतिवेदक :: नबदीप छेत्री, मूल–सचिव, विश्वनाथ जिल्ला समिति।
