उदालगुडी, ११ अक्टोबर २०२६: अखिल असम गोर्खा छात्र संघ (आग्सु), उदालगुडी महाविद्यालय एकाइको आयोजनामा तथा उदालगुडी आञ्चलिक समितिको सहयोगमा १६औँ वार्षिक रमाइलो भेटघाट समारोह–२०२६ आइतबार उदालगुडीस्थित गोर्खा प्रेक्षागृहमा भव्यताका साथ सम्पन्न भएको छ।

उदालगुडी महाविद्यालय एकाइका सभापति हृतिक छेत्रीको सभापतित्वमा सम्पन्न उक्त कार्यक्रममा एकाइका मूल सचिव अञ्जली छेत्री र पूर्व सभापति कालिदास छेत्रीले सञ्चालनको जिम्मेवारी निर्वाह गरेका थिए।

कार्यक्रममा अखिल असम गोर्खा छात्र संघ, उदालगुडी जिल्ला समितिका सभापति श्री विकाश शर्मा प्रमुख अतिथिका रूपमा उपस्थित थिए। त्यस्तै, श्री रुपम आत्रेय निर्दिष्ट वक्ता तथा डा. रमेश दाहाल विशेष प्रेरक वक्ताका रूपमा उपस्थित थिए। कार्यक्रममा शिक्षक लक्ष्मण अधिकारी, असम नेपाली साहित्य सभाको उदालगुडी जिल्ला समितिका सभापति तथा मूल सचिव, असम गोर्खा सम्मेलनको उदालगुडी जिल्ला समितिका सभापति, आग्सु उदालगुडी जिल्ला समितिका विभिन्न पदाधिकारी, खौराङ, खुसुराबारी हाबी तथा बान्दरगुडी आञ्चलिक समितिका सभापति, मूल सचिवलगायत विभिन्न पदाधिकारीहरूको उपस्थिति रहेको थियो।

यसका साथै विभिन्न क्षेत्रका बुद्धिजीवी, समाजसेवी, सामाजिक व्यक्तित्व तथा विद्यार्थीहरूको उल्लेखनीय सहभागिताले कार्यक्रमलाई थप उत्साहपूर्ण बनाएको थियो।

विभिन्न महाविद्यालयमा अध्ययनरत गोर्खा विद्यार्थीहरूबीच आपसी सद्भाव, एकता, भाइचारा तथा सङ्गठनात्मक भावना अभिवृद्धि गर्ने उद्देश्यले आयोजना गरिएको यस समारोहले विद्यार्थीहरूलाई एउटै साझा मञ्चमा एकत्रित गर्ने अवसर प्रदान गरेको छ। यस्ता कार्यक्रमले विद्यार्थीहरूबीच परिचय विस्तार गर्न, आपसी सम्बन्धलाई प्रगाढ बनाउन तथा सामाजिक र सङ्गठनात्मक सहकार्यलाई थप सुदृढ बनाउन महत्त्वपूर्ण योगदान पुर्‍याउने विश्वास व्यक्त गरिएको छ।

कार्यक्रमका क्रममा उपस्थित अतिथि तथा वक्ताहरूको सहभागिताले विद्यार्थीहरूलाई सङ्गठनप्रति जिम्मेवार बन्न, आपसी एकता कायम राख्न तथा समाजको शैक्षिक, सामाजिक र सांस्कृतिक विकासमा सक्रिय भूमिका निर्वाह गर्न प्रेरणा प्रदान गरेको आयोजक पक्षले जनाएको छ।

आग्सु विद्यार्थीहरूको हकहितको संरक्षणसँगै उनीहरूको व्यक्तित्व विकास, नेतृत्व क्षमता अभिवृद्धि तथा सामाजिक उत्तरदायित्वको भावना विकास गर्न प्रतिबद्ध रहेको सन्दर्भमा यस्ता वार्षिक कार्यक्रमहरूलाई महत्त्वपूर्ण अवसरका रूपमा लिइएको छ। विद्यार्थीहरूबीच एकता र सहकार्यको भावना बलियो बनाउँदै सङ्गठनलाई थप सुदृढ बनाउनु यस समारोहको प्रमुख उद्देश्य रहेको थियो।

कार्यक्रमको अन्त्यमा एकाइका मूल सचिव अञ्जली छेत्रीले समारोहलाई सफल बनाउन सहयोग पुर्‍याउने उदालगुडी महाविद्यालय एकाइका सम्पूर्ण पदाधिकारी तथा सदस्यहरू, आमन्त्रित अतिथिहरू र सहभागी सबैप्रति हार्दिक धन्यवाद तथा आभार व्यक्त गरेकी थिइन्।

प्रतिवेदक: अञ्जली छेत्री, मूल सचिव, आग्सु, उदालगुडी महाविद्यालय एकाइ।