बाक्सा, १३ सेप्टेम्बर: अखिल असम गोर्खा छात्र संघ (AAGSU) बाक्सा जिल्ला समितिका सभापति श्री दिपेन्द्र कार्कीको नेतृत्वमा जिल्ला समितिको टोलीले मुसलपुरस्थित बेलतोल गाउँ निवासी नरबहादुर लामा तथा सुकुमाया लामाको निवासमा पुगेर परिवारको शारीरिक तथा आर्थिक अवस्थाबारे प्रत्यक्ष जानकारी लिएको छ।
उक्त टोलीमा बाक्सा जिल्ला समितिका पदाधिकारी तथा कार्यकर्ताहरूका साथै AAGSU केन्द्रीय समितिका उपसभापति प्रकाश कोइराला र BTC क्षेत्रीय समितिका मूल–सचिव राजु सुबेदीलगायतको उपस्थिति रहेको थियो।
वृद्ध आमासहित जम्मा तीन जना सदस्य रहेको उक्त परिवारका दुई जना सदस्य शारीरिक रूपमा अपाङ्गता भएका कारण परिवारको मुख्य जिम्मेवारी तथा सहाराको भार वृद्ध आमामाथि रहेको टोलीले जनाएको छ। आर्थिक अवस्था कमजोर हुनुका साथै उपचार तथा दैनिक जीवनयापनमा समेत कठिनाइ भोगिरहेको परिवारको वास्तविक अवस्थाबारे टोलीले प्रत्यक्ष रूपमा जानकारी लिएको हो।
परिवारसँग भेटघाटका क्रममा उनीहरूले भोग्दै आएका समस्या तथा आवश्यकताबारे विस्तृत जानकारी संकलन गरिएको थियो। साथै, परिवारको समस्या सम्बन्धित सरकार तथा सरोकारवाला निकायसमक्ष पुर्याई आवश्यक सहयोग, उपचार तथा सरकारी सेवा–सुविधा उपलब्ध गराउन पहल गर्ने प्रतिबद्धता AAGSU टोलीले व्यक्त गरेको छ।
AAGSU विद्यार्थी तथा युवाहरूको हकहितमा मात्र सीमित नरही समाजमा रहेका विपन्न, असहाय, शारीरिक रूपमा अपाङ्गता भएका तथा विभिन्न कठिन परिस्थितिमा जीवनयापन गरिरहेका परिवारको साथमा पनि उभिनुपर्नेमा टोलीले जोड दिएको छ। आर्थिक तथा सामाजिक रूपमा पछाडि परेका परिवारको वास्तविक अवस्था पहिचान गरी उनीहरूको समस्या सम्बन्धित निकायसम्म पुर्याउनु र आवश्यक सहयोगका लागि पहल गर्नु सामाजिक संस्थाको महत्वपूर्ण जिम्मेवारी भएको टोलीले जनाएको छ।
प्रत्यक्ष रूपमा परिवारसँग भेटेर उनीहरूको अवस्था बुझ्दा मात्र वास्तविक समस्या पहिचान गर्न सकिने भएकाले आगामी दिनमा पनि समाजका विभिन्न क्षेत्र तथा समुदायमा पुगेर समस्यामा परेका परिवारको पहिचान गर्ने, सम्बन्धित निकायसँग समन्वय गर्ने तथा उपलब्ध सरकारी सेवा–सुविधा र सहयोग उनीहरूसम्म पुर्याउन AAGSU ले निरन्तर पहल गर्ने बताइएको छ।
यसै क्रममा नरबहादुर लामा तथा सुकुमाया लामाको परिवारका लागि आवश्यक उपचार, आर्थिक तथा सामाजिक सुरक्षा सुविधालगायत उपलब्ध सरकारी सेवाहरू प्राप्त गर्न सम्बन्धित निकायसमक्ष विषय उठान गरी आवश्यक प्रक्रिया अघि बढाउने AAGSU ले जनाएको छ। साथै, स्थानीय तह, सम्बन्धित विभाग तथा अन्य सरोकारवाला निकायसँग समन्वय गर्दै समस्या समाधानका लागि आवश्यक पहल र सहजीकरणलाई निरन्तरता दिने प्रतिबद्धता व्यक्त गरिएको छ।
प्रतिवेदक : श्रीमान पवन सोनारी, सूचना एवं प्रविधि सचिव, बाक्सा जिल्ला समिति
