विश्वनाथ, १९ अगस्त: असमको भूमि तथा भौगोलिक पहिचानको सही संरक्षण र डिजिटल नक्सामा वास्तविक प्रशासनिक सीमाको उचित प्रतिबिम्ब सुनिश्चित गर्न अखिल असम गोर्खा छात्र संघ (आग्सु), विश्वनाथ जिल्ला समितिले महत्त्वपूर्ण पहल गरेको छ। यसै क्रममा विश्वनाथ जिल्ला समितिको एक प्रतिनिधिमण्डलले विश्वनाथ जिल्लाका जिल्ला आयुक्त समक्ष एक महत्त्वपूर्ण ज्ञापनपत्र बुझाउँदै गहपुर सम-जिल्ला अन्तर्गत राजगढ क्षेत्रमा असम–अरुणाचल प्रदेश सीमासम्बन्धी Google Map मा देखिएको त्रुटि तत्काल सच्याउन माग गरेको छ।
राजगढस्थित असम–अरुणाचल प्रदेश सीमाको असमअन्तर्गत पर्ने भूभाग Google Map मा गलत रूपमा अरुणाचल प्रदेशको भूभागका रूपमा देखाइएको विषयलाई आग्सुले गम्भीरतापूर्वक उठाएको हो। डिजिटल नक्सामा देखिएको यस्तो त्रुटिले सीमावर्ती क्षेत्रमा बसोबास गर्ने स्थानीय नागरिकहरूमा आफ्नो भूमि, प्रशासनिक क्षेत्र तथा भौगोलिक पहिचानबारे अनावश्यक भ्रम सिर्जना गरिरहेको प्रतिनिधिमण्डलले जिल्ला प्रशासनसमक्ष अवगत गराएको छ।
प्रतिनिधिमण्डलका अनुसार कुनै पनि भूभागको वास्तविक प्रशासनिक पहिचान सरकारी राजस्व अभिलेख, आधिकारिक प्रशासनिक दस्तावेज तथा सम्बन्धित सरकारी अभिलेखका आधारमा निर्धारण हुने गर्दछ। तर, आधिकारिक अभिलेखसँग मेल नखाने गरी डिजिटल नक्सामा भूभागलाई अर्को राज्यअन्तर्गत देखाइँदा यसले भविष्यमा नागरिकका लागि विभिन्न प्रकारका प्रशासनिक तथा व्यावहारिक समस्या सिर्जना गर्न सक्ने सम्भावना रहन्छ।
विशेषगरी सीमावर्ती क्षेत्रमा नागरिकता, भूमि अभिलेख, राजस्वसम्बन्धी काम, सरकारी सेवा तथा अन्य प्रशासनिक प्रक्रियामा डिजिटल स्थान पहिचानको प्रयोग बढ्दै गइरहेको अवस्थामा Google Map मा देखिएको यस्तो गलत विवरणले जनतामा थप अन्योल उत्पन्न गर्न सक्ने आग्सुको भनाइ छ। आगामी जनगणना तथा अन्य सरकारी सेवासम्बन्धी प्रक्रियामा समेत डिजिटल स्थान पहिचानको विषयले महत्त्व राख्ने भएकाले यसलाई समयमै सम्बोधन गर्न आवश्यक रहेको प्रतिनिधिमण्डलले जोड दिएको छ।
आग्सु विश्वनाथ जिल्ला समितिले जिल्ला प्रशासनलाई सम्बन्धित राजस्व अभिलेख तथा आधिकारिक प्रशासनिक दस्तावेजका आधारमा उक्त क्षेत्रको वास्तविक स्थिति तत्काल जाँच गर्न अनुरोध गरेको छ। साथै, आवश्यक प्रमाण तथा सरकारी अभिलेखका आधारमा सम्बन्धित Google Authorities सँग औपचारिक रूपमा सम्पर्क गरी Google Map मा देखिएको त्रुटि यथाशीघ्र सच्याउने पहल गर्न पनि माग गरिएको छ।
प्रतिनिधिमण्डलले यो विषयलाई केवल डिजिटल नक्साको सामान्य प्राविधिक त्रुटिका रूपमा मात्र नलिई असमको भौगोलिक तथा प्रशासनिक पहिचानसँग जोडिएको संवेदनशील विषयका रूपमा लिन जिल्ला प्रशासनसमक्ष आग्रह गरेको छ। सीमावर्ती क्षेत्रका नागरिकहरूको अधिकार, भूमि तथा प्रशासनिक पहिचानमा कुनै प्रकारको भ्रम वा अन्योल उत्पन्न नहोस् भन्ने उद्देश्यले शीघ्र समाधान आवश्यक रहेको आग्सुको भनाइ छ।
जिल्ला प्रशासनले ज्ञापनपत्रलाई सकारात्मक रूपमा लिँदै आवश्यक छानबिन तथा सम्बन्धित निकायसँग समन्वय गरी समस्या समाधानका लागि द्रुत कदम चाल्नेमा आग्सु विश्वनाथ जिल्ला समिति आशावादी रहेको जनाएको छ।
असमको भूमि, जनताको अधिकार र राज्यको सही भौगोलिक पहिचानको संरक्षणका लागि अखिल असम गोर्खा छात्र संघ (आग्सु) सदैव प्रतिबद्ध रहने जिल्ला समितिले स्पष्ट गरेको छ। असमको प्रत्येक इन्च जमिनको सही पहिचान र आधिकारिक अभिलेखको सम्मान सुनिश्चित गर्न सम्बन्धित सबै पक्षले जिम्मेवार ढङ्गले पहल गर्नुपर्नेमा समेत समितिले जोड दिएको छ।
प्रतिवेदक : तरुण उपाध्याय, भारप्राप्त सभापति, विश्वनाथ जिल्ला आग्सु
