धेमाजी जिल्लाको सिलासुति पञ्चायत अन्तर्गत २ नं. सिली गाउँका स्थायी बासिन्दा दिट्टा बदला र रेखा बदलाका योग्य सुपुत्र दीपाङ्कर बदलाले राष्ट्रिय स्तरको प्रतिष्ठित फुटबल प्रतियोगिता U-17 Subroto Mukherjee Cup मा उत्कृष्ट प्रदर्शन गर्दै ठूलो सफलता हासिल गरेका छन्। अरुणाचल प्रदेशमा आयोजित उक्त प्रतियोगितामा सहभागी भई उनले Champion टोलीको सदस्य बन्नुका साथै आफ्नो असाधारण खेलकौशलका कारण “Player of the Match” को उपाधि समेत प्राप्त गर्न सफल भएका हुन्। दीपाङ्करको यस ऐतिहासिक उपलब्धिले न केवल उनको परिवार, गाउँ र जिल्लालाई गौरवान्वित बनाएको छ, साथै सम्पूर्ण गोर्खा समाजका लागि पनि प्रेरणाको स्रोत बनेको छ।
सानै उमेरदेखि फुटबलप्रति गहिरो रुचि र समर्पण देखाउँदै आएका दीपाङ्करले निरन्तर अभ्यास, अनुशासन र आत्मविश्वासका साथ आफ्नो प्रतिभालाई निखार्दै आएका थिए। कठिन परिश्रम र संघर्षको परिणामस्वरूप उनले राष्ट्रिय स्तरको प्रतियोगितामा आफूलाई प्रमाणित गर्न सफल भएका छन्। U-17 Subroto Mukherjee Cup जस्तो प्रतिष्ठित प्रतियोगितामा उत्कृष्ट खेल प्रदर्शन गर्दै Champion टोलीमा स्थान बनाउनु कुनै साधारण उपलब्धि होइन। त्यसमा पनि “Player of the Match” को उपाधि हासिल गर्नु दीपाङ्करको व्यक्तिगत क्षमताको स्पष्ट प्रमाण हो।
दीपाङ्कर बदलाको यस गौरवमय सफलतालाई सम्मान गर्दै अखिल असम गोर्खा छात्र संघ (आग्सु) सिलासुति आञ्चलिक समितिको तर्फबाट विशेष कार्यक्रमको आयोजना गरी उनको घरमै पुगेर सम्मान गरिएको छ। उक्त अवसरमा आग्सु सिलासुति आञ्चलिक समितिका पदाधिकारी तथा सदस्यहरूको उपस्थितिमा दीपाङ्करलाई फूलमाला, सम्मानपत्र तथा शुभकामनासहित सम्मान प्रदान गरिएको थियो। कार्यक्रमका दौरान वक्ताहरूले दीपाङ्करको संघर्ष, अनुशासन र लगनशीलताको प्रशंसा गर्दै उनको उज्ज्वल भविष्यको कामना व्यक्त गरे।
आग्सु सिलासुति आञ्चलिक समितिले दीपाङ्करको सफलता स्थानीय स्तरका खेलाडीहरूका लागि प्रेरणाको स्रोत बन्ने विश्वास व्यक्त गर्दै खेलकुद क्षेत्रलाई अझ सशक्त बनाउने आवश्यकतामाथि जोड दिएको छ। समितिका अनुसार, यस्ता प्रतिभावान खेलाडीलाई समयमै प्रोत्साहन र उचित मार्गदर्शन प्रदान गर्न सके भविष्यमा अझ ठूलो स्तरमा सफलता हासिल गर्न सकिनेछ। दीपाङ्करको उपलब्धिले ग्रामीण क्षेत्रबाट पनि राष्ट्रिय स्तरका उत्कृष्ट खेलाडी उत्पादन हुन सक्ने सम्भावनालाई उजागर गरेको छ।
सम्मान कार्यक्रममा दीपाङ्करका अभिभावक दिट्टा बदला र रेखा बदलाले आफ्नो छोराको सफलताप्रति गर्व व्यक्त गर्दै आग्सु सिलासुति आञ्चलिक समितिलाई धन्यवाद ज्ञापन गरे। उनीहरूले दीपाङ्करको यस यात्रामा सहयोग गर्ने सबै प्रशिक्षक, शुभेच्छुक र संगठनप्रति कृतज्ञता व्यक्त गरे। कार्यक्रममा उपस्थित स्थानीयवासीहरूले पनि दीपाङ्करको उपलब्धिलाई ऐतिहासिक भन्दै भविष्यमा अझ ठूलो उपलब्धि हासिल गर्ने विश्वास व्यक्त गरेका थिए।
दीपाङ्कर बदलाको यस सफलताले सिलासुति क्षेत्र मात्र नभई सम्पूर्ण धेमाजी जिल्लामा उत्साह र सकारात्मक ऊर्जा फैलाएको छ। उनको उपलब्धि भावी पुस्ताका खेलाडीहरूका लागि मार्गदर्शक बनेको छ र खेलकुद क्षेत्रमा समर्पण र परिश्रमको महत्वलाई पुनः पुष्टि गरेको छ।

प्रतिवेदन: अरुण खतिवडा-सभापति, सिलासुति आञ्चलिक समिति(आग्स)।