উমৰাংছু, ১০ জুনঃ সদৌ অসম গোৰ্খা ছাত্ৰ সন্থা, উমৰাংছু আঞ্চলিক সমিতিৰ এটি সঁজাতি দলে আজি উমৰাংছু আৰক্ষী চকীৰ ভাৰপ্ৰাপ্ত আৰক্ষী বিষয়া মৃগেন শইকীয়াক সৌজন্যমূলকভাৱে সাক্ষাৎ কৰি সম্বৰ্ধনা জ্ঞাপন কৰে।
উক্ত সঁজাতি দলত উমৰাংছু আঞ্চলিক সমিতিৰ সভাপতি মোহন চেত্ৰী, সাধাৰণ সম্পাদক চন্দন শৰ্মা, উপ-সভাপতি গণেশ শৰ্মা আৰু উপ-সভাপতি কৃষ্ণ শৰ্মা উপস্থিত আছিল। প্ৰতিনিধি দলটোৱে আৰক্ষী বিষয়া মৃগেন শইকীয়াক ফুলাম গামোচা আৰু সম্বৰ্ধনা স্মাৰক প্ৰদান কৰি শুভেচ্ছা জ্ঞাপন কৰে।
সাক্ষাৎকালত অঞ্চলটোৰ আইন-শৃংখলা পৰিস্থিতি, সামাজিক সম্প্ৰীতি, যুৱ সমাজৰ ভূমিকা আৰু বিভিন্ন জনস্বাৰ্থজড়িত বিষয়ৰ ওপৰত সৌহাৰ্দ্যপূৰ্ণ আলোচনা অনুষ্ঠিত হয়। প্ৰতিনিধি দলটোৱে উমৰাংছু অঞ্চলত শান্তি-শৃংখলা বজাই ৰখা, অপৰাধ নিয়ন্ত্ৰণ আৰু জনসাধাৰণৰ সুৰক্ষা নিশ্চিত কৰাৰ ক্ষেত্ৰত আৰক্ষী বিভাগে আগবঢ়াই অহা ভূমিকাৰ শলাগ লয়।
আলোচনাৰ সময়ত সমাজ আৰু আৰক্ষী প্ৰশাসনৰ মাজত সু-সম্পৰ্ক আৰু সমন্বয় অধিক শক্তিশালী কৰাৰ ওপৰতো গুৰুত্ব আৰোপ কৰা হয়। সদৌ অসম গোৰ্খা ছাত্ৰ সন্থাৰ প্ৰতিনিধিসকলে সমাজৰ বিভিন্ন সমস্যা সমাধান আৰু যুৱ প্ৰজন্মক ইতিবাচক দিশত আগবঢ়াই নিয়াৰ ক্ষেত্ৰত আৰক্ষী বিভাগৰ সহযোগিতা কামনা কৰে।
ভাৰপ্ৰাপ্ত আৰক্ষী বিষয়া মৃগেন শইকীয়াই সংগঠনটোৰ এই সৌজন্যমূলক সাক্ষাৎ আৰু সম্বৰ্ধনাৰ বাবে ধন্যবাদ জ্ঞাপন কৰি ভৱিষ্যততো অঞ্চলটোৰ শান্তি, সম্প্ৰীতি আৰু আইন-শৃংখলা সুদৃঢ় কৰি ৰাখিবলৈ আৰক্ষী বিভাগ সদায় প্ৰতিশ্ৰুতিবদ্ধ হৈ থাকিব বুলি উল্লেখ কৰে।
উল্লেখ্য যে সদৌ অসম গোৰ্খা ছাত্ৰ সন্থা, উমৰাংছু আঞ্চলিক সমিতিয়ে সময়ে সময়ে সামাজিক, শৈক্ষিক আৰু জনকল্যাণমূলক কাৰ্যসূচীৰ জৰিয়তে সমাজৰ বিভিন্ন স্তৰৰ ব্যক্তিসকলৰ সৈতে সমন্বয় ৰক্ষা কৰি আহিছে। এই সম্বৰ্ধনা অনুষ্ঠানেও সমাজ আৰু আৰক্ষী প্ৰশাসনৰ মাজৰ সৌহাৰ্দ্যপূৰ্ণ সম্পৰ্ক অধিক সুদৃঢ় কৰাৰ ক্ষেত্ৰত ইতিবাচক ভূমিকা পালন কৰিব বুলি আশা প্ৰকাশ কৰা হয়।
প্ৰতিবেদক: মোহন ছেত্ৰী- সভাপতি, উমৰাংছু আঞ্চলিক সমিতি ।
