डिमाकुची, २० मे २०२६: अखिल असम गोर्खा छात्र संघ, डिमाकुची आञ्चलिक समितिको अन्तर्गत रजागढ शाखा निवासी स्वर्गीय टिकाराम अधिकारी ज्यूको केही दिनअघि ट्रेन स्टेशनमा भएको दुःखद दुर्घटनाका कारण असामयिक निधन भएको खबरले हामी सम्पूर्ण रूपमा अत्यन्त मर्माहत भएका छौं। उहाँको निधनले केवल एउटा परिवारले मात्र आफ्नो अभिभावक गुमाएको होइन, समाजले पनि एक सरल, मिलनसार, सहयोगी तथा सम्मानित व्यक्तित्वलाई गुमाएको महसुस गरेको छ। उहाँको असामयिक बिदाइले सम्पूर्ण समाजमा गहिरो शोकको वातावरण सिर्जना गरेको छ।
स्वर्गीय अधिकारी ज्यू समाजमा आफ्नो सरल स्वभाव, विनम्र व्यवहार तथा सबैसँगको आत्मीय सम्बन्धका कारण विशेष रूपमा परिचित हुनुहुन्थ्यो। समाजका विभिन्न गतिविधिहरूमा उहाँको सक्रिय सहभागिता र सहयोगी भावना सधैं प्रशंसनीय रहँदै आएको थियो। उहाँले आफ्नो जीवनकालमा समाजमा आपसी सद्भाव, एकता तथा सकारात्मक सोचको विकासमा पुर्याउनुभएको योगदान सबैका लागि प्रेरणादायी रहेको छ। उहाँको व्यक्तित्वले धेरै मानिसहरूको मनमा एउटा छुट्टै स्थान बनाएको थियो, त्यसैले उहाँको असामयिक निधनले परिवार, आफन्त तथा सम्पूर्ण समाजलाई अपूरणीय क्षति पुगेको छ।
यस दुःखद घडीमा आज अखिल असम गोर्खा छात्र संघका बि:टि:सि क्षेत्रीय समितिका सचिव श्रीमान सुदर्शन भुसाल ज्यूको उपस्थितिमा तथा डिमाकुची आञ्चलिक समितिको एक प्रतिनिधि टोली स्वर्गीय अधिकारी ज्यूको निवासमा उपस्थित भई दिवंगत आत्माप्रति भावपूर्ण श्रद्धाञ्जली अर्पण गरेको छ। साथै शोकाकुल परिवारजनसँग भेटघाट गर्दै यस असहनीय पीडाको घडीमा गहिरो समवेदना प्रकट गरिएको छ।
प्रतिनिधि टोलीले परिवारजनमा धैर्य र साहस कायम रहोस् तथा यस दुःखद परिस्थितिलाई सहन सक्ने शक्ति प्राप्त होस् भनी भगवानसँग प्रार्थना गरेको छ। जीवनको यो क्षति अपूरणीय भए तापनि स्वर्गीय अधिकारी ज्यूका असल कर्म, व्यवहार र समाजप्रतिको योगदान सधैं जीवित रहने विश्वास व्यक्त गरिएको छ।
स्वर्गीय टिकाराम अधिकारी ज्यूको आत्माको चिरशान्तिको कामना गर्दै उहाँप्रति पुनः हार्दिक श्रद्धाञ्जली अर्पण गर्दछौं तथा शोक सन्तप्त परिवारजनप्रति गहिरो समवेदना व्यक्त गर्दछौं।
