मालिभिटा, २८ जनवारी: अखिल असम गोर्खा छात्र संघ, मालिभिटा शाखा समितिको आयोजनामा HSLC परीक्षामा सहभागी छात्र–छात्राहरूको शैक्षिक स्तर अभिवृद्धि गर्ने उद्देश्यले सञ्चालन गरिएको मोक टेस्ट तथा त्यसको पुरस्कार वितरण एवं जागरूकता कार्यक्रम २६ जनवरी २०२६ का दिन मालिभिटा गोर्खा भवनमा भव्य र सफलतापूर्वक सम्पन्न भएको छ।
उक्त मोक टेस्टमा सहभागी छात्र–छात्राहरूलाई उनीहरूको प्रदर्शनको आधारमा मूल्याङ्कन गरी पुरस्कार प्रदान गरिएको थियो। मोक टेस्टमा उत्कृष्ट प्रदर्शन गर्दै प्रथम स्थान हासिल गर्न सफल छात्रा रुपा देवीलाई प्रथम पुरस्कार प्रदान गरिएको थियो भने द्वितीय स्थान हासिल गर्ने छात्र यदुराज मिश्रलाई द्वितीय पुरस्कार प्रदान गरिएको थियो। साथै, मोक टेस्टमा सबैभन्दा बढी अंक प्राप्त गर्ने, मध्यम अंक प्राप्त गर्ने तथा अलिकति कम अंक प्राप्त गर्ने छात्र–छात्राहरूलाई समेत उत्साहवर्धनस्वरूप पुरस्कार प्रदान गर्दै उनीहरूलाई आगामी HSLC परीक्षाका लागि प्रेरित गरिएको थियो।
कार्यक्रमको मूल उद्देश्य छात्र–छात्राहरूमा परीक्षाप्रति आत्मविश्वास बढाउनु, समय व्यवस्थापन, प्रश्न बुझ्ने क्षमता तथा उत्तर लेखनको स्तर सुधार गर्नुका साथै अभिभावकहरूलाई पनि शैक्षिक सचेतना प्रदान गर्नु रहेको थियो। यस अवसरमा उपस्थित वक्ताहरूले नियमित अध्ययन, अनुशासन, सकारात्मक सोच र निरन्तर अभ्यास नै सफलताको मुख्य आधार भएको भन्दै छात्र–छात्राहरूलाई लक्ष्यप्रति दृढ रहन आग्रह गर्नुभयो।
उक्त कार्यक्रममा BTC क्षेत्रीय समितिका साहित्य सचिव, चिराङ जिल्ला समितिका साहित्य सचिव, स्वयंसेवक प्रमुख, हिमाली आञ्चलिक समितिबाट सभापति, शिक्षा सचिव तथा सम्पूर्ण टोलीको गरिमामय उपस्थिति रहेको थियो। साथै मालिभिटा शाखा समितिका सम्पूर्ण टोली, असम गोर्खा सम्मेलन चिराङ जिल्ला समितिका उप सभापति, HSLC मा सहभागी सम्पूर्ण छात्र–छात्रा तथा उनीहरूका अभिभावकहरूको उल्लेखनीय उपस्थिति रहेको थियो।

कार्यक्रमका क्रममा वक्ताहरूले अखिल असम गोर्खा छात्र संघले शिक्षा क्षेत्रमा पुर्‍याउँदै आएको योगदानको प्रशंसा गर्दै यस्ता मोक टेस्ट तथा मार्गदर्शन कार्यक्रमहरूले ग्रामीण तथा अर्ध–ग्रामीण क्षेत्रका विद्यार्थीहरूलाई ठूलो लाभ पुर्‍याउने धारणा व्यक्त गर्नुभयो। विद्यार्थीहरूलाई परीक्षा केवल डरको विषय नभई आफ्नो क्षमतालाई निखार्ने अवसरका रूपमा लिनुपर्ने सन्देश समेत दिइयो।
कार्यक्रमको अन्त्यमा मालिभिटा शाखा समितिले कार्यक्रम सफल बनाउन सहयोग पुर्‍याउने सबै अतिथि, अभिभावक, स्वयंसेवक, शिक्षक तथा छात्र–छात्राहरूलाई धन्यवाद ज्ञापन गर्दै आगामी दिनहरूमा पनि यस्ता शैक्षिक तथा जागरूकतामूलक कार्यक्रम निरन्तर रूपमा सञ्चालन गर्ने प्रतिबद्धता व्यक्त गरियो। समग्रमा, HSLC मोक टेस्ट पुरस्कार वितरण तथा जागरूकता कार्यक्रमले छात्र–छात्राहरूमा नयाँ ऊर्जा, आत्मविश्वास र सफलताप्रति दृढ संकल्प जागृत गराउन महत्वपूर्ण भूमिका खेलेको स्पष्ट देखिएको छ।

प्रतिवेदक: अशोक छेत्री मूल सचिव, मालिभिटा शाखा समिति(आग्सु)