मिति १२ जनवरी २०२६ का दिन बेलुकी ठीक ६:०० बजे हरिसिंगा क्षेत्रमा अखिल असम गोर्खा छात्र संघ (आग्सु) हरिसिंगा आञ्चलिक समिति, उडालगुरी BTR को नेतृत्वमा स्वर्गीय प्रशान्त तामाङप्रति विशेष श्रद्धाञ्जली कार्यक्रम भावपूर्ण र गरिमामय वातावरणमा सम्पन्न भएको छ। यस संयुक्त श्रद्धाञ्जली कार्यक्रममा हरिसिंगा आञ्चलिक आग्सु सहित जम्मा सातवटा शाखा समितिहरूको सक्रिय सहभागिता रहेको थियो, जसले कार्यक्रमलाई अझ व्यापक, अनुशासित र अर्थपूर्ण बनाएको थियो।
कार्यक्रमको सुरुवात स्वर्गीय प्रशान्त तामाङको तस्बिरमा पुष्प अर्पण तथा दीप प्रज्वलनबाट गरिएको थियो। उपस्थित सम्पूर्ण सदस्य, पदाधिकारी तथा शुभेच्छुकहरूले केही समय मौन धारण गरी दिवंगत आत्माप्रति श्रद्धा, सम्मान र प्रार्थना अर्पण गरे। श्रद्धाञ्जली सभामा स्वर्गीय प्रशान्त तामाङले गोर्खा समुदाय मात्र नभई सम्पूर्ण भारतीय संगीत जगतलाई पुर्याएको अतुलनीय योगदानको स्मरण गरियो। उहाँको स्वर, कला, सादगी र जनतासँगको आत्मीय सम्बन्ध सधैं स्मरणीय रहने विषयमा उपस्थित वक्ताहरूले भावुक अभिव्यक्ति व्यक्त गरे।
स्वर्गीय प्रशान्त तामाङ केवल एक सफल गायक मात्र नभई गोर्खा पहिचान, संस्कृति र आत्मसम्मानका प्रतीकका रूपमा स्थापित हुनुहुन्थ्यो। भारतीय आइडलको मञ्चबाट सम्पूर्ण देशभर गोर्खा समुदायको नाम उजागर गर्न उहाँले खेलेको भूमिका ऐतिहासिक रहेको चर्चा गरियो। उहाँको सफल यात्राले हजारौं युवा–युवतीलाई प्रेरणा दिएको र संगीतमार्फत सकारात्मक सन्देश फैलाएको उल्लेख गरिँदै, उहाँ सधैं हाम्रा हृदयमा जीवित रहने विश्वास व्यक्त गरियो।
कार्यक्रममा सहभागी सातै शाखा समितिहरूले संयुक्त रूपमा यस्तो श्रद्धाञ्जली कार्यक्रम आयोजना गरेर एकता, सहकार्य र संगठनात्मक अनुशासनको उदाहरण प्रस्तुत गरेका छन्। आग्सु हरिसिंगा आञ्चलिक समिति, उडालगुरी BTR ले कार्यक्रमको सम्पूर्ण व्यवस्थापनलाई शान्त, मर्यादित र अनुशासित ढंगले सम्पन्न गरेकोमा उपस्थित सबैले प्रशंसा व्यक्त गरे। यस प्रकारका कार्यक्रमहरूले संगठनलाई सामाजिक, सांस्कृतिक र भावनात्मक रूपमा अझ मजबुत बनाउने विश्वास व्यक्त गरियो।
कार्यक्रमको अन्त्यमा “प्रसान्त तामाङ अमर रहून्” भन्ने भावनासहित दिवंगत आत्माको चिरशान्तिको कामना गर्दै “ॐ शान्ति ॐ” उच्चारण गरियो। स्वर्गीय प्रशान्त तामाङको सम्झना, योगदान र प्रेरणा सदैव अमर रहनेछ भन्ने दृढ विश्वासका साथ श्रद्धाञ्जली कार्यक्रम सफलतापूर्वक सम्पन्न भएको जानकारी गराइन्छ।
प्रतिवेदन: दिपक बिश्वकर्मा- सभापति, हरिसिंगा आञ्चलिक समिति, आग्सु।
