तारियनी, २१ जुनः पर्यावरण संरक्षण, हरियाली प्रवर्द्धन तथा स्थानीय वनस्पतिको संरक्षण गर्ने उद्देश्यले अखिल असम गोर्खा छात्र संघ (आग्सु) तारियनी आञ्चलिक समितिको तत्त्वावधानमा नर्सरी निर्माण कार्यक्रमको भव्य शुभारम्भ गरिएको छ। शनिबार आयोजित कार्यक्रममा स्थानीयवासी, संगठनका कार्यकर्ता तथा विभिन्न तहका प्रतिनिधिहरूको उत्साहजनक सहभागिता रहेको थियो।
कार्यक्रमको उद्घाटन आदरणीया पद्मा माया छेत्री कोइरालाको बाहुलीबाट सम्पन्न भएको थियो। उद्घाटन समारोहमा जिल्ला स्तरीय तथा आञ्चलिक समितिका पदाधिकारीहरू, कार्यकर्ताहरू र स्थानीय सचेत नागरिकहरूको उल्लेखनीय उपस्थिति रहेको थियो। उपस्थित महानुभावहरूले पर्यावरण संरक्षण आजको प्रमुख आवश्यकता भएको उल्लेख गर्दै आग्सुले अघि सारेको यस अभियानको प्रशंसा गरेका थिए।
आग्सु तारियनी आञ्चलिक समितिले सञ्चालन गरेको यस महत्त्वाकांक्षी योजनाअन्तर्गत लालचन्दनसहित विभिन्न बहुमूल्य तथा उपयोगी प्रजातिका ५,००० भन्दा बढी बिरुवा उत्पादन गर्ने लक्ष्य राखिएको छ। उत्पादन गरिएका बिरुवाहरू आगामी दिनमा विभिन्न स्थानहरूमा रोपेर तारियनी क्षेत्रलाई हराभरा बनाउने तथा पर्यावरणीय सन्तुलन कायम गर्न योगदान पुर्याइने जानकारी आयोजकहरूले दिएका छन्।
कार्यक्रममा वक्ताहरूले बढ्दो वन विनाश, जलवायु परिवर्तन तथा वातावरणीय असन्तुलनका कारण प्रकृतिमा देखापरेका चुनौतीहरूबारे चर्चा गर्दै यस्ता अभियानहरूले समाजमा सकारात्मक सन्देश प्रवाह गर्ने बताएका थिए। साथै, स्थानीय तथा रैथाने वनस्पतिको संरक्षण गर्दै जैविक विविधताको जगेर्ना गर्नु वर्तमान समयको आवश्यकता रहेको धारणा व्यक्त गरिएको थियो।
नर्सरी निर्माण कार्यक्रमका माध्यमबाट स्थानीय प्रजातिका बिरुवाहरूको संरक्षण, पर्यावरणीय सन्तुलन कायम राख्ने तथा युवा र विद्यार्थी वर्गमा प्रकृतिप्रतिको जिम्मेवारीबोध जगाउने उद्देश्य राखिएको आयोजक पक्षले जनाएको छ। कार्यक्रममा सहभागी युवाहरूले पनि पर्यावरण संरक्षणलाई सामाजिक अभियानका रूपमा अघि बढाउनुपर्नेमा जोड दिएका थिए।
आग्सु तारियनी आञ्चलिक समितिका प्रतिनिधिहरूले संगठनले केवल विद्यार्थी हकहितका विषयमा मात्र नभई समाज, संस्कृति तथा पर्यावरणसँग सम्बन्धित जनहितका कार्यक्रमहरूलाई पनि निरन्तरता दिँदै आएको उल्लेख गरे। आगामी दिनहरूमा यस नर्सरीबाट उत्पादन हुने बिरुवाहरूको व्यापक वृक्षारोपण अभियान सञ्चालन गरी तारियनी क्षेत्रमा हरियाली विस्तार गर्ने योजना रहेको जानकारी समेत दिइएको छ।
कार्यक्रमको समापनमा सबै सहभागीहरूलाई धन्यवाद ज्ञापन गर्दै पर्यावरण संरक्षणको अभियानलाई सफल बनाउन सम्पूर्ण समाजको सक्रिय सहयोग आवश्यक रहेको बताइएको थियो। स्थानीयवासीहरूले पनि यस पहलप्रति पूर्ण समर्थन जनाउँदै तारियनीलाई हराभरा, स्वच्छ र वातावरणमैत्री क्षेत्रका रूपमा विकास गर्न सामूहिक प्रयास जारी राख्ने प्रतिबद्धता व्यक्त गरेका छन्।
प्रतिवेदक : लखि शर्मा-प्रचार सचिव, आग्सु।
