तिनसुकिया, पावोई, 26 अप्रेल : अखिल असम गोर्खा छात्र संघ (AAGSU) केतेटोंग पावोई बङ्गाउँ आञ्चलिक समितिको आयोजनामा शैक्षिक सत्र 2025-26 वर्षको हाइ स्कुल शिक्षान्त परीक्षा (HSLC) मा सफलता हासिल गर्ने विद्यार्थीहरूलाई सम्मान गर्न एक भव्य विद्यार्थी सम्मान कार्यक्रम आज सफलतापूर्वक सम्पन्न भएको छ। विद्यार्थीहरूको मेहनत, लगनशीलता र उत्कृष्ट नतिजालाई उच्च मूल्याङ्कन गर्दै आयोजना गरिएको यस कार्यक्रममा केतेटोंग पावोई बङ्गाउँ आञ्चलिक क्षेत्रअन्तर्गतका कुल २१ जना विद्यार्थीहरूलाई खादा तथा प्रमाणपत्र प्रदान गरी स-सम्मान अभिनन्दन गरिएको थियो।
कार्यक्रममा मुख्य अतिथिको रूपमा आग्सु (AAGSU) तिनसुकिया जिल्ला समितिका सभापति श्री देव गुरुङ तथा मूल–सचिव श्री शंकर जैसीको गरिमामय उपस्थिति रहेको थियो। उहाँहरूको उपस्थितिले कार्यक्रमलाई अझ गरिमामय बनाएको थियो। साथै, जिल्ला समितिका अन्य विशिष्ट पदाधिकारीहरूको पनि उल्लेखनीय उपस्थिति रहेको थियो।
मुख्य अतिथि तथा अतिथिहरूले विद्यार्थीहरूको कडा परिश्रम, अनुशासन र लक्ष्यप्रतिको समर्पणको उच्च प्रशंसा गर्दै आगामी दिनमा उच्च शिक्षा हासिल गर्नका लागि सही दिशा र प्रेरणा प्रदान गरेका थिए। उनीहरूले विद्यार्थीहरूको सफलता केवल व्यक्तिगत उपलब्धि मात्र नभई सम्पूर्ण समाजका लागि प्रेरणादायी उदाहरण भएको धारणा व्यक्त गरे।
यस वर्ष उत्तीर्ण भएका विद्यार्थीहरूमध्ये श्री मोतीलाल क्षेत्रीकी सुपुत्री मिस प्रिया क्षेत्रीले ९२ प्रतिशत अंक प्राप्त गरी उत्कृष्ट नतिजासहित सम्पूर्ण क्षेत्रलाई गौरवान्वित तुल्याएकी छन्। उनको यस उल्लेखनीय उपलब्धिलाई उपस्थित अतिथिहरू तथा आयोजक समितिले विशेष रूपमा सराहना गर्दै उनलाई अन्य विद्यार्थीहरूका लागि प्रेरणाको स्रोतका रूपमा उल्लेख गरेका थिए।
कार्यक्रमको समापन गर्दै आग्सु केतेटोंग पावोई बङ्गाउँ आञ्चलिक समितिले सम्पूर्ण उत्तीर्ण विद्यार्थीहरूलाई उज्ज्वल भविष्यको हार्दिक शुभकामना व्यक्त गरेको छ। साथै, समितिले यस क्षेत्रको शैक्षिक उन्नयन र विद्यार्थीहरूको सर्वाङ्गीण विकासका लागि आगामी दिनहरूमा पनि शिक्षा क्षेत्रमा निरन्तर सहयोग गरिरहने दृढ प्रतिबद्धता जनाएको छ। यस कार्यक्रमले विद्यार्थीहरूमा नयाँ ऊर्जा र आत्मविश्वास थप्नुका साथै समाजमा शैक्षिक चेतना अभिवृद्धि गर्न महत्वपूर्ण भूमिका खेलेको स्थानीय शिक्षाप्रेमीहरूले बताएका छन्।
प्रतिवेदक: कुमार छेत्री, कार्यकारिणी सदस्य, तिनसुकिया जिल्ला समिति।
