तिनसुकिया: २५ जुलाई: शनिबार अखिल असम गोर्खा छात्र संघ (AAGSU) तिनसुकिया जिल्ला समितिको अन्तर्गत दुमदुमा आञ्चलिक समितिको पञ्चम द्विवार्षिक प्रतिनिधि सभा भव्य रूपमा दुमदुमा प्रेस क्लबको प्रेक्षागृहमा सम्पन्न भएको छ। प्रतिनिधि सभामा आञ्चलिक समितिका प्रतिनिधि, जिल्ला तथा केन्द्रीय तहका पदाधिकारीहरूको उल्लेखनीय उपस्थिति रहेको थियो।
कार्यक्रमको सुरुवात सङ्गठनको झण्डोत्तोलन, दीप प्रज्वलन तथा स्वागत मन्तव्यसँगै गरिएको थियो। त्यसपछि आञ्चलिक समितिको विगत दुई वर्षको सांगठनिक गतिविधि, आर्थिक प्रतिवेदन तथा विभिन्न सामाजिक एवं शैक्षिक कार्यक्रमहरूको समीक्षा प्रस्तुत गरियो। उपस्थित प्रतिनिधिहरूले प्रतिवेदनमाथि छलफल गर्दै आगामी कार्यकालका लागि विविध सुझावसमेत दिएका थिए।

प्रतिनिधि सभाले सर्वसम्मत रूपमा भीष्म प्रधानलाई दुमदुमा आञ्चलिक समितिको सभापति तथा अभिजित छेत्रीलाई मुख्य सचिव चयन गर्दै ४० सदस्यीय नयाँ कार्यसमिति गठन गरेको छ। नवगठित कार्यसमितिले विद्यार्थीहरूको शैक्षिक, सामाजिक तथा नेतृत्व विकासका क्षेत्रमा सक्रिय भूमिका निर्वाह गर्दै सङ्गठनलाई थप गतिशील र प्रभावकारी बनाउने प्रतिबद्धता व्यक्त गरेको छ।
प्रतिनिधि सभामा अखिल असम गोर्खा छात्र संघ, तिनसुकिया जिल्ला समितिका पर्यवेक्षण मण्डलीका सदस्यहरू, जिल्ला सभापति, जिल्ला सम्पादक, केन्द्रीय सांगठनिक सचिव तथा अन्य विशिष्ट अतिथिहरूको उपस्थिति रहेको थियो। अतिथिहरूले नवगठित नेतृत्वलाई बधाई दिँदै विद्यार्थी समुदायको हक–हित संरक्षण, शैक्षिक जागरण, सामाजिक उत्तरदायित्व तथा सङ्गठनात्मक एकतालाई अझ सुदृढ बनाउन नयाँ कार्यसमितिले प्रभावकारी भूमिका खेल्ने विश्वास व्यक्त गरे।

कार्यक्रमका क्रममा विद्यार्थीसँग सम्बन्धित समसामयिक समस्या, शैक्षिक गुणस्तर अभिवृद्धि, करियर मार्गदर्शन, सामाजिक सचेतना, युवाहरूको नेतृत्व विकास तथा आगामी दिनमा सञ्चालन गरिने विभिन्न अभियानबारे विस्तृत छलफल गरिएको थियो। साथै, सङ्गठनलाई गाउँदेखि जिल्ला तथा केन्द्रीय तहसम्म अझ बलियो र प्रभावकारी बनाउने रणनीति तय गर्ने विषयमा समेत प्रतिनिधिहरूबीच विचार–विमर्श भएको थियो।
प्रतिनिधि सभाको समापनमा नवनिर्वाचित पदाधिकारीहरूले आफूहरूमाथि गरिएको विश्वासप्रति आभार व्यक्त गर्दै सङ्गठनको उद्देश्य र आदर्शलाई आत्मसात् गर्दै विद्यार्थी हितका लागि निरन्तर क्रियाशील रहने प्रतिबद्धता जनाएका थिए। कार्यक्रम सौहार्दपूर्ण वातावरणमा सम्पन्न भएको आयोजक समितिले जनाएको छ।