डिमा हासाओ, ३१ मेः अखिल असम गोर्खा छात्र संघ (आग्सु) हाफलोंग कलेज इकाईको पुनर्गठन सभा ३१ मे २०२६ का दिन हाफलोंगमा सफलतापूर्वक सम्पन्न भएको छ। विद्यार्थी संगठनलाई अझ सक्रिय, सशक्त तथा प्रभावकारी बनाउने उद्देश्यका साथ आयोजित उक्त सभामा आग्सु डिमा हासाओ जिल्ला समितिका पत्रिका सचिव प्रतिक कार्की तथा कार्यकारिणी सदस्य सपना छेत्री पर्यवेक्षकका रूपमा उपस्थित रहेका थिए।
कार्यक्रमको प्रारम्भ हाफलोंग कलेज इकाईकी सभापति ममता जोइशीको स्वागत मन्तव्यबाट भएको थियो। उनले उपस्थित सम्पूर्ण विद्यार्थी, प्रतिनिधि तथा अतिथिहरूलाई स्वागत गर्दै संगठनको गतिविधिलाई निरन्तरता दिन सबैको सक्रिय सहभागिताको आवश्यकता औंल्याइन्। त्यसपछि मूल-सचिव उज्ज्वल जोइशीले संगठनको वर्तमान अवस्था, आगामी कार्ययोजना तथा विद्यार्थी समुदायका विविध समस्याहरूका विषयमा आफ्नो धारणा राखेका थिए।
सभामा पर्यवेक्षकद्वय प्रतिक कार्की र सपना छेत्रीले सम्बोधन गर्दै विद्यार्थी संगठनले समाज र समुदायप्रति जिम्मेवार भूमिका निर्वाह गर्नुपर्ने आवश्यकता औंल्याए। उनीहरूले डिमा हासाओ जिल्लाका गोर्खा विद्यार्थीहरूको शैक्षिक, सामाजिक तथा नेतृत्व विकासका लागि एकताबद्ध भएर कार्य गर्न आग्रह गरे। साथै संगठनको उद्देश्य र सिद्धान्तलाई आत्मसात गर्दै अनुशासित तथा जिम्मेवार ढंगले अगाडि बढ्न सम्पूर्ण सदस्यहरूलाई प्रेरित गरे।
छलफल तथा मन्तव्य कार्यक्रम सम्पन्न भएपछि हाफलोंग कलेज इकाईको पुरानो कार्यसमितिलाई औपचारिक रूपमा विघटन गरिएको थियो। त्यसपश्चात् उपस्थित सदस्यहरूको सर्वसम्मत निर्णयका आधारमा नयाँ कार्यसमिति गठन गरियो। नवगठित समितिको सभापतिमा देवेन्द्र शर्मा चयन भए भने मूल-सचिव पदमा उज्ज्वल जोइशी चयन भएका छन्। यसका अतिरिक्त ३७ जना विद्यार्थीहरूलाई विभिन्न पद तथा जिम्मेवारी प्रदान गरिएको जानकारी प्राप्त भएको छ।
नयाँ कार्यसमिति गठनपछि नव-निर्वाचित पदाधिकारी तथा सदस्यहरूले संगठनको हित, विद्यार्थी अधिकारको संरक्षण तथा गोर्खा विद्यार्थी समुदायको समग्र उन्नतिका लागि समर्पित भएर कार्य गर्ने प्रतिबद्धता व्यक्त गरेका थिए। उनीहरूले संगठनलाई अझ गतिशील, उत्तरदायी तथा प्रभावकारी बनाउँदै विद्यार्थीहरूको आवाजलाई सशक्त रूपमा उठाउने विश्वास समेत व्यक्त गरे।
सौहार्दपूर्ण तथा उत्साहजनक वातावरणमा सम्पन्न उक्त पुनर्गठन सभाले हाफलोंग कलेजका गोर्खा विद्यार्थीहरूबीच नयाँ ऊर्जा र उत्साह थपेको सहभागीहरूले बताएका छन्। नवगठित कार्यसमितिले निकट भविष्यमा विभिन्न शैक्षिक, सामाजिक तथा संगठनात्मक कार्यक्रमहरू सञ्चालन गर्ने योजना बनाएको समेत जानकारी दिइएको छ।
प्रतिवेदक: उज्ज्वल जैसी- सुचना एवं प्रविधि सचिव, डिमा हसाओ जिल्ला समिति।
