तेजपुर, २५ मेः अखिल असम गोर्खा छात्र संघ (आग्सु), शोणितपुर जिल्ला समितिको आयोजनामा आगामी ३१ मे २०२६ आइतबारका दिन तेजपुरस्थित गोर्खा सांस्कृतिक प्रकल्प एवं शोध केन्द्र, नेपालीपथमा सम्पन्न हुन गइरहेको जिल्ला द्विवार्षिक प्रतिनिधि सभाको सम्पूर्ण तयारी अहिले तीव्र रूपमा अघि बढिरहेको छ। जिल्लाभरिका विभिन्न आञ्चलिक समितिहरूमा प्रतिनिधि सभालाई लिएर उत्साह, उमंग र संगठनप्रतिको प्रतिबद्धता स्पष्ट रूपमा देखापरेको छ।
जिल्ला कार्यकारिणी समितिको हालै सम्पन्न बैठकले प्रतिनिधि सभालाई व्यवस्थित, भव्य तथा सफल रूपमा सम्पन्न गर्ने उद्देश्यले विविध निर्णयहरू पारित गरेपछि सम्पूर्ण संगठनात्मक गतिविधिहरू तीव्र बनाइएको हो। जिल्लाअन्तर्गतका आञ्चलिक समितिहरूले प्रतिनिधि छनोट, नामावली संकलन तथा आवश्यक व्यवस्थापन कार्यहरूलाई प्राथमिकताका साथ अघि बढाइरहेका छन्। संगठनको भावी दिशा निर्धारण गर्ने महत्वपूर्ण मञ्चका रूपमा हेरिएको प्रतिनिधि सभालाई लिएर विद्यार्थी तथा युवा वर्गमा विशेष उत्साह देखिएको छ।
प्रतिनिधि सभामा जिल्लाभरिका विभिन्न आञ्चलिक समितिबाट प्रतिनिधिहरूको उल्लेखनीय सहभागिता रहने बताइएको छ। संगठनको वर्तमान अवस्था, आगामी कार्ययोजना, विद्यार्थी समुदायका समस्या, शिक्षा क्षेत्रका चुनौती, भाषा–संस्कृति संरक्षण, सामाजिक उत्तरदायित्व तथा गोर्खा समुदायका विविध विषयहरूमाथि विस्तृत छलफल हुने कार्यक्रम रहेको छ। साथै संगठनलाई समयानुकूल थप सशक्त, सक्रिय र जनमुखी बनाउने विषयमा समेत विशेष निर्णयहरू गरिने अपेक्षा गरिएको छ।
आग्सु शोणितपुर जिल्ला समितिका सभापति दीपक सुब्बाले प्रतिनिधि सभा संगठनको लागि अत्यन्त महत्वपूर्ण अवसर भएको बताउँदै सम्पूर्ण आञ्चलिक समितिहरूलाई जिम्मेवारीपूर्वक सक्रिय भूमिका निर्वाह गर्न आग्रह गरेका छन्। उनले संगठनलाई बलियो बनाउन युवा विद्यार्थीहरूको सहभागिता अपरिहार्य रहेको उल्लेख गर्दै प्रतिनिधि सभाले आगामी दिनका लागि संगठनलाई स्पष्ट दिशा प्रदान गर्ने विश्वास व्यक्त गरेका छन्।
त्यसैगरी मूल–सचिव हितेश पराजुलीले प्रतिनिधि सभा सफल बनाउन विभिन्न उप–समितिहरू गठन गरी आवश्यक कार्यहरूलाई तीव्रता दिइएको जानकारी दिएका छन्। सभास्थल व्यवस्थापन, प्रतिनिधि स्वागत, आवास, भोजन, यातायात तथा कार्यक्रम सञ्चालनसँग सम्बन्धित सम्पूर्ण तयारी योजनाबद्ध रूपमा अघि बढिरहेको उनले बताएका छन्। सभालाई अनुशासित, प्रभावकारी तथा ऐतिहासिक बनाउने लक्ष्यका साथ जिल्ला समिति निरन्तर सक्रिय रहेको समेत उनले स्पष्ट पारे।
प्रतिनिधि सभाको अवसरमा संगठनका पूर्व पदाधिकारी, विभिन्न सामाजिक व्यक्तित्व तथा शुभेच्छुकहरूको समेत उपस्थिति रहने सम्भावना रहेको बताइएको छ। यस कार्यक्रममार्फत संगठनभित्र आपसी समन्वय, एकता र संगठनात्मक चेतनालाई थप मजबुत बनाउने अपेक्षा गरिएको छ।
जिल्लाभरिका आग्सु कार्यकर्ताहरू अहिले प्रतिनिधि सभा सफल बनाउन आ–आफ्नो क्षेत्रमा सक्रिय रूपमा खटिरहेका छन्। विभिन्न आञ्चलिक समितिहरूमा बैठक, छलफल तथा तयारी कार्यक्रमहरू निरन्तर सञ्चालन भइरहेका छन्। संगठनप्रति विद्यार्थीहरूको आकर्षण र सहभागिता बढ्दै गएको अवस्थामा हुन गइरहेको यो प्रतिनिधि सभा आग्सु शोणितपुर जिल्ला समितिको संगठनात्मक इतिहासमा महत्वपूर्ण माइलस्टोन बन्ने विश्वास गरिएको छ।
प्रतिवेदक: सुरज पौडेल- सभापति, शिङरी आञ्चलिक समिति।
