खौराङ, २५ अगस्त २०२६: अखिल असम गोर्खा छात्र संघ (आग्सु), खौराङ आञ्चलिक समितिको आयोजनामा भारतीय स्वतन्त्रता संग्राम तथा आजाद हिन्द फौजका वीर योद्धा अमर शहीद मेजर दुर्गा मल्लको ८२औँ बलिदान दिवस श्रद्धा, सम्मान र देशभक्तिपूर्ण वातावरणमा सम्पन्न गरिएको छ। खौराङ आञ्चलिक समितिको मुख्यालय परिसरमा आयोजित कार्यक्रममा शहीद मेजर दुर्गा मल्लको त्याग, साहस, बलिदान र राष्ट्रप्रतिको समर्पणलाई स्मरण गर्दै भावपूर्ण श्रद्धाञ्जली अर्पण गरिएको थियो।
कार्यक्रमको प्रारम्भ समाजसेवी डम्बर दर्जीद्वारा दीप प्रज्वलन गरी गरिएको थियो। त्यसपछि खौराङ भीसीडीसीका सभापति टेकबहादुर प्रधानले शहीद मेजर दुर्गा मल्लको प्रतिमामा माल्यार्पण गरी श्रद्धाञ्जली अर्पण गरे। कार्यक्रममा उपस्थित आग्सुका पदाधिकारी तथा सदस्यहरू, शुभेच्छुक, स्थानीय गोर्खा समुदाय तथा आमजनताले पनि शहीदको प्रतिमामा पुष्पगुच्छा अर्पण गर्दै सम्मान व्यक्त गरेका थिए।
कार्यक्रममा असम गोर्खा सम्मेलन, उदालगुडी जिल्ला समितिका सचिव शान्ता सिर्पाली विशिष्ट वक्ताका रूपमा उपस्थित थिए। उनले मेजर दुर्गा मल्लको जीवन, सैनिक यात्रा, आजाद हिन्द फौजसँगको सम्बन्ध तथा भारतीय स्वतन्त्रता आन्दोलनमा उहाँले पुर्याएको योगदानबारे प्रकाश पारे। मेजर दुर्गा मल्ल केवल गोर्खा समुदायका गौरव मात्र नभई सम्पूर्ण भारतीय समाज र राष्ट्रका वीर सपूत भएको उल्लेख गर्दै उनले देशको स्वतन्त्रताका लागि व्यक्तिगत जीवन, परिवार र भविष्यको समेत पर्वाह नगरी बलिदानको बाटो रोज्नु उहाँको अदम्य साहस र राष्ट्रभक्तिको अनुपम उदाहरण भएको बताए।
बलिदान दिवसका अवसरमा मेजर दुर्गा मल्लको जीवनी तथा योगदानमाथि चर्चा–परिचर्चा समेत गरिएको थियो। वक्ताहरूले उहाँको बाल्यकालदेखि सैनिक जीवनसम्मका विभिन्न पक्ष, आजाद हिन्द फौजमा आबद्धता, स्वतन्त्रता आन्दोलनमा निर्वाह गरेको भूमिका तथा अन्तिम समयसम्म कायम रहेको राष्ट्रप्रतिको निष्ठाबारे जानकारी गराएका थिए। शहीदको जीवन संघर्ष र योगदानलाई नयाँ पुस्तासम्म पुर्याउनु सबैको साझा दायित्व भएकोमा पनि जोड दिइएको थियो।
कार्यक्रममा आजको पुस्ताले शहीदहरूको बलिदानलाई केवल सम्झनाको दिनका रूपमा सीमित नराखी उहाँहरूले देखाएको आदर्शलाई व्यवहारमा उतार्नुपर्ने धारणा व्यक्त गरियो। शिक्षा, अनुशासन, एकता, आपसी सद्भाव, सामाजिक सेवा तथा राष्ट्रप्रतिको जिम्मेवारीको भावना विकास गर्न सके मात्र शहीदहरूप्रति सच्चा श्रद्धाञ्जली हुने बताइएको थियो। विशेषगरी गोर्खा समुदायका युवाहरूले आफ्नो इतिहास, भाषा, संस्कृति तथा वीर पुर्खाहरूको योगदानबारे अध्ययन गरी त्यसलाई भावी पुस्तासम्म संरक्षण र प्रचार–प्रसार गर्नुपर्नेमा जोड दिइयो।
कार्यक्रममा ८२औँ बलिदान दिवस तथा १२औँ शहीद मेजर दुर्गा मल्ल स्मृति फुटबल प्रतियोगिता–२०२६ को स्वागतकारिणी समितिका सभापति पूर्ण छेत्री, कार्यकारी सभापति टेकबहादुर प्रधान तथा मूल–सचिव किशोर सिर्पालीसहित सम्पूर्ण स्वागतकारिणी समितिप्रति अखिल असम गोर्खा छात्र संघ (आग्सु), खौराङ आञ्चलिक समितिले आभार व्यक्त गरेको छ।
खौराङ आञ्चलिक समितिले सामाजिक, शैक्षिक, सांस्कृतिक तथा खेलकुदलगायत विभिन्न गतिविधिमार्फत गोर्खा समुदायमा एकता, जागरण र सामाजिक चेतना अभिवृद्धि गर्दै आएको जनाइएको छ। सोही क्रममा शहीद मेजर दुर्गा मल्लको बलिदान दिवसलाई पनि हरेक वर्ष श्रद्धा र सम्मानका साथ स्मरण गर्दै नयाँ पुस्तालाई उहाँको इतिहास तथा योगदानसँग जोड्ने प्रयास गरिएको आयोजक पक्षले जनाएको छ।
कार्यक्रमको अन्त्यमा उपस्थित सबैले शहीद मेजर दुर्गा मल्लप्रति भावपूर्ण श्रद्धाञ्जली अर्पण गर्दै उहाँको त्याग, साहस र बलिदानलाई सदैव स्मरण गर्ने प्रतिबद्धता व्यक्त गरे। देश र समाजका लागि जीवन अर्पण गर्ने वीर शहीदहरूको योगदानबाट प्रेरणा लिँदै वर्तमान पुस्ताले समाजमा सकारात्मक परिवर्तन ल्याउन सक्रिय भूमिका निर्वाह गर्नुपर्ने सन्देशका साथ कार्यक्रम सम्पन्न गरिएको थियो।
