तारियनी, १ जुलाई: विद्यार्थीहरूको गर्मी बिदालाई सिर्जनात्मक तथा उपलब्धिमूलक बनाउने उद्देश्यका साथ अखिल असम गोर्खा छात्र संघ (आग्सु) तारियनी आंचलिक समितिले कक्षा IX र X मा अध्ययनरत विद्यार्थीहरूका लागि १५ दिने निःशुल्क समर कोचिङ कक्षा सञ्चालन गर्ने भएको छ। आगामी ५ जुलाईदेखि १९ जुलाई २०२६ सम्म सञ्चालन हुने उक्त शैक्षिक कार्यक्रम तारियनी नेपाली एम.भी. स्कूलमा आयोजना गरिने आयोजकले जनाएको छ।

आग्सु तारियनी आंचलिक समितिका अनुसार विद्यार्थीहरूको आधारभूत ज्ञान, विषयगत दक्षता तथा आगामी शैक्षिक यात्रालाई थप मजबुत बनाउने लक्ष्यका साथ यस कार्यक्रमको आयोजना गरिएको हो। आर्थिक अवस्था वा अन्य कारणले अतिरिक्त ट्युसन लिन नसक्ने विद्यार्थीहरूलाई पनि समान अवसर उपलब्ध गराउने उद्देश्यले सम्पूर्ण कक्षा पूर्ण रूपमा निःशुल्क सञ्चालन गरिनेछ।

कोचिङ कक्षामा गणित, विज्ञान, अंग्रेजी तथा अंग्रेजी व्याकरण विषयको अध्यापन गराइनेछ। अनुभवी तथा योग्य शिक्षकहरूको सहभागितामा सञ्चालन हुने यस कार्यक्रमले विद्यार्थीहरूको सिकाइ क्षमतामा सकारात्मक प्रभाव पार्ने विश्वास आयोजकको छ।

आग्सुले कक्षाहरू सुरु हुनुअघि दैनिक समय–तालिका तथा अध्यापन गर्ने शिक्षकहरूको विस्तृत विवरण सार्वजनिक गरिने जनाएको छ। साथै कार्यक्रमलाई व्यवस्थित, प्रभावकारी र गुणस्तरीय बनाउन आवश्यक सम्पूर्ण तयारी तीव्र गतिमा भइरहेको जानकारी पनि समितिले दिएको छ।

विद्यार्थी तथा अभिभावकहरूलाई समयमै नाम दर्ता गर्न आग्रह गर्दै आयोजकले सिट संख्या सीमित रहेकाले ढिलाइ नगरी आग्सु तारियनी आंचलिक समितिका सदस्यहरूसँग सम्पर्क गर्न अनुरोध गरेको छ।

आग्सुले शिक्षा नै समाज रूपान्तरणको सबैभन्दा बलियो माध्यम भएको उल्लेख गर्दै भविष्यमा पनि विद्यार्थीको हित, शैक्षिक विकास तथा सामाजिक उत्तरदायित्वसँग सम्बन्धित यस्ता रचनात्मक कार्यक्रमलाई निरन्तरता दिइने प्रतिबद्धता व्यक्त गरेको छ। “गुणस्तरीय शिक्षा, समृद्ध भविष्य – हाम्रो प्रतिबद्धता” भन्ने मूल नारासहित सञ्चालन हुन लागेको यस समर कोचिङ कार्यक्रमले तारियनी क्षेत्रका विद्यार्थीहरूलाई उल्लेखनीय रूपमा लाभ पुग्ने विश्वास स्थानीय अभिभावक तथा शिक्षाप्रेमीहरूले व्यक्त गरेका छन्।

प्रतिवेदक: सागर शर्मा- शिक्षा सचिव,तारियनी आञ्चलिक समिति।