मरिगाउँ, ३० सेप्टेम्बर २०२६: अखिल असम गोर्खा छात्र संघ (AAGSU), मरिगाउँ जिल्ला समितिको तत्वावधानमा आज जागीरोड कलेजका गोर्खा विद्यार्थीहरूको उपस्थितिमा एक महत्त्वपूर्ण सांगठनिक बैठक सम्पन्न भयो। नेपाली बस्ती, जागीरोडस्थित शिव मन्दिर परिसरमा आयोजित उक्त सभाले विद्यार्थीहरूको शैक्षिक हित, हक-अधिकार तथा नेतृत्व विकासलाई अघि बढाउने उद्देश्यका साथ आग्सु जागीरोड कलेज युनिट को नयाँ कार्यसमिति सर्वसम्मतिले गठन गरेको छ।

आज सम्पन्न यस विशेष सभामा जागीरोड कलेजका थुप्रै विद्यार्थीहरूको उत्साहजनक सहभागिता रहेको थियो। सभाले सर्वसम्मत निर्णय गर्दै नयाँ समितिको सभापति पदमा सन्देश विष्ट तथा मूल सचिव पदमा सञ्जला सापकोटालाई चयन गरेको छ। साथै, कलेजभित्रका गोर्खा विद्यार्थीहरूको सर्वाङ्गीण विकास, शैक्षिक समस्या समाधान र रचनात्मक गतिविधिहरूलाई तीव्रता दिनका लागि पूर्ण कार्यसमितिको समेत चयन गरिएको छ।

नवनिर्वाचित नेतृत्वलाई बधाई ज्ञापन गर्दै आग्सु मरिगाउँ जिल्ला समितिले नवगठित समितिका सभापति सन्देश विष्ट, मूल सचिव सञ्जला सापकोटा लगायत सम्पूर्ण पदाधिकारीहरूलाई हार्दिक अभिनन्दन तथा सफल कार्यकालको शुभकामना व्यक्त गरेको छ।

जिल्ला समितिका पदाधिकारीहरूले नवनिर्वाचित टोलीलाई सम्बोधन गर्दै जागीरोड कलेज एकाइले आउँदा दिनहरूमा विद्यार्थी एकता, अनुशासन, उच्च शिक्षाको प्रवर्द्धन तथा गोर्खा जातिको पहिचान र अधिकारका निम्ति सकारात्मक र सशक्त भूमिका निर्वाह गर्ने विश्वास व्यक्त गरे।
कार्यक्रमको अन्त्यमा नवनिर्वाचित सभापति र मूल सचिवले संगठनले सुम्पेको जिम्मेवारी निष्ठापूर्वक पूरा गर्ने, कलेजका सबै विद्यार्थीहरूलाई एकजुट बनाउने र संगठनलाई नयाँ उचाइमा पुर्‍याउने दृढ सङ्कल्प व्यक्त गरे। सभा सौहार्दपूर्ण वातावरणमा सम्पन्न भएको थियो।

प्रतिवेदक: आदित्य शर्मा- सुचना एवं प्रविधि सचिव, मरिगाउँ जिल्ला समिति।